पुणे : मुलांमध्ये भांडणे सुरू असताना ती सोडविण्यासाठी गेलेल्या अजोबांना मारहाण करण्याचा प्रकार समोर आला आहे. तर, दुसऱ्या तक्रारीत मुलांनी वडिलांना मारहाण करुन जखमी केल्याचे म्हटले आहे. याप्रकरणी अरुण शंकर गायकवाड (वय ६५, रा. लोहियानगर) यांनी खडक पोलीस ठाण्यात फिर्याद दिली आहे. त्यानुसार पोलिसांनी रोहित थोरात, सुनिल थोरात व प्रथमेश थोरात (रा. लोहियानगर) यांच्यावर गुन्हा दाखल केला आहे. हा प्रकार लोहियानगरमधील गल्ली नं. १ मधील रोडवर बुधवारी सायंकाळी सव्वा चार वाजता घडला.
पोलिसांनी सांगितले की, फिर्यादी यांचा नातू तुषार गायकवाड व रोहित थोरात यांच्यात भांडणे चालू होती. ती पाहून अरुण गायकवाड हे भांडणे सोडविण्यासाठी गेले. तेव्हा रोहित थोरात याने फिर्यादींना तू मध्ये का येतो, असे म्हणून त्याच्या हातातील टणक वस्तू फिर्यादीच्या डोक्यात मारुन जखमी केले. तसेच प्रथमेश व सुनिल थोरात यांनी शिवीगाळ करुन लाथाबुक्क्यांनी मारहाण केली. त्याविरोधात प्रथमेश थोरात (वय २१, रा. लोहियानगर) याने खडक पोलीस ठाण्यात फिर्याद दिली आहे.
त्यानुसार पोलिसांनी सागर गायकवाड, साहील गायकवाड, भारत गायकवाड, तुषार गायकवाड (सर्व रा. लोहियानगर) यांच्यावर गुन्हा दाखल केला आहे. फिर्यादीचा भाऊ रोहित थोरात व तुषार गायकवाड यांच्यामध्ये भांडणे चालू होती. ही भांडणे सोडविण्यासाठी फिर्यादीचे वडिल सुनिल थोरात हे गेले. ते भांडणे सोडवून घरी जात असताना सागर गायकवाड व इतरांनी त्यांना लाथाबुक्क्यांनी मारहाण करुन फरशी व सिमेंट ब्लॉकनी फिर्यादी व त्यांचे वडिलांना डोक्यात, पाठीवर मारुन जखमी केले. पोलीस हवालदार येलपले तपास करीत आहेत.
