न्हावरे : शिरूर तालुक्यामध्ये परप्रांतीय कामगारांची माहिती लपविण्याचा मुद्दा पुन्हा एकदा ऐरणीवर आला आहे. मांडवगण फराटा (ता.शिरूर) येथे तब्बल वर्षभरापूर्वी म्हणजे 1 ऑक्टोबर 2024 रोजी नवनाथ कोंडे यांच्या ऊसाच्या गुऱ्हाळावर काम करणाऱ्या एका परप्रांतीय कामगाराचा मृतदेह भीमा नदीपात्रात आढळून आला होता. या घटनेनंतर गुऱ्हाळावरील दोन कामगारांना पोलिसांनी आरोपी ठरवून अटक केली.
या आरोपींमध्ये एक अल्पवयीन मुलगा असूनही, त्याला पोलिस कोठडी देण्यात आली आणि जवळपास आठ महिने येरवडा कारागृहात ठेवण्यात आले. त्यानंतर त्याच्या आईने बाल न्यायालयात मुलगा अल्पवयीन असल्याचे पुरावे सादर केल्यानंतर न्यायालयाने त्याला जामीन मंजूर केला. या घडामोडींमुळे शिरूर पोलिसांच्या तपासातील त्रुटी आणि कायद्याचा चुकीचा वापर उघडकीस आला आहे.
दरम्यान, या प्रकरणातील मृत व्यक्तीची खरी ओळख पटवण्यासाठी शिरूर पोलिसांनी काहीच ठोस कार्यवाही केली नसल्याचे समोर आले आहे. त्यामुळे या गंभीर प्रकरणाची गुंतागुंत दिवसेंदिवस वाढत असून, संबंधित गुऱ्हाळ मालकाला कामगारांविषयी माहिती होती का? गुऱ्हाळ मालकाने परप्रांतीय कामगारांची माहिती मांडवगण फराटा किंवा शिरूर पोलिसांना दिली होती का? की जाणीवपूर्वक ती लपवली गेली? या सर्व प्रश्नांबाबत गुऱ्हाळ मालकाचीही भूमिका संशयास्पद ठरत आहे.
या प्रकरणामुळे शिरूर तालुक्यात परप्रांतीय कामगारांची माहिती योग्य रितीने नोंदवली जात नसल्याचे समोर आले आहे. यासाठी पोलिसांबरोबरच गुऱ्हाळ मालकही जबाबदार आहेत. या घटनेमुळे एक अल्पवयीन मुलगा आरोपी ठरला असून, त्याचे भविष्य धोक्यात आले आहे. असे त्याच्या आईने मुंबई हायकोर्टात दाखल केलेल्या रीट याचिकेद्वारे सांगितले.
त्यामुळे मांडवगण फराटा गुऱ्हाळ कामगार मृत्यू प्रकरण दिवसेंदिवस वेगवेगळे वळण घेत आहे. याप्रकरणी नेमके सत्य समोर येण्याऐवजी कोणाला तरी वाचवले जात आहे. यावर अधिक भर दिला जात असल्याची चर्चा सुरू आहे. त्यामुळे या प्रकरणातील खरी माहिती समोर आणून दोषींवर कठोर कारवाई व्हावी. अशी मागणी अल्पवयीन आरोपी मुलाच्या आईने रिट याचिकेद्वारे केली आहे.
