पुणे : महापालिकेच्या वतीने गेल्या तीन वर्षांपासून ११ डिसेंबर रोजी पादचारी दिन साजरा केला जातो. यंदा पादचारी दिनानिमित्त पुणे महापालिकेने एक अनोखा निर्णय घेतला आहे. सोमवारी सकाळी दहा ते सायंकाळी आठ या कालावधीत (ता. ११) लक्ष्मी रस्ता वाहनविरहित ठेवण्यात येणार आहे. वाहतुकीसाठी आणि पार्किंगसाठी लक्षमी रस्ता बंद असेल.
पादचारी दिन साजरा करणारे पुणे हे देशातील पहिले शहर ठरले आहे. पुण्यात पादचारी दिनानिमित्त विविध उपक्रमांचे आयोजन केले आहे. याबाबतची माहिती पथ विभागाचे मुख्य अभियंता अनिरुद्ध पावसकर यांनी दिली. वाहतूक पोलीस, लक्ष्मी रस्ता व्यापारी संघटना आणि पथारी संघटनेच्या सहकार्यातून हा उपक्रम राबविण्यात येणार आहे. पादचाऱ्यांच्या सुविधेसाठी महामेट्रोकडून डेक्कन मेट्रो स्थानक ते महापालिका भवन स्थानक या दरम्यान सायकली उपलब्ध करून देण्यात येणार असून, पीएमपीकडून ज्यादा गाड्या उपलब्ध करून देण्यात येणार आहेत. पादचाऱ्यांना विनाअडथळा चालता यावे, यासाठी वाहनचालकांनी पर्यायी रस्त्यांचा वापर करावा, असे आवाहन महापालिकेकडून करण्यात आले आहे.
या उपक्रमामुळे नगरकर तालीम चौक ते गरूड गणपती चौकादरम्यान पादचाऱ्यांना विनाअडथळा चालता येणार आहे. लक्ष्मी रस्त्यावरील नगरकर तालीम चौक ते गरूड गणपती चौक आकर्षक पद्धतीने सजविण्यात येणार आहे. शहराच्या विविध भागांत पदपथांची देखभाल-दुरुस्ती करून पादचाऱ्यांना पदपथावरून विनाअडथळा चालता येईल, अशी व्यवस्था केली जाणार आहे. शहरातील शंभर महत्त्वाच्या चौकांत पादचारी सुरक्षेबाबत उपाययोजना केल्या जात आहेत.
विशेष म्हणजे या दिवशी सामान्य नागरिकांनाही कला सादर करण्याची संधी मिळणार असून ‘वॉकिंग प्लाझा’चे व्यासपीठ त्यांच्यासाठी खुले राहणार आहे. लक्ष्मी रस्त्याला नुकतीच १०० वर्षे पूर्ण झाली आहेत. या उपक्रमाच्या निमित्ताने या रस्त्याला नवे रूप येणार असून, यादिवशी खासगी गाड्यांचा वापर करू नये, असे आवाहन महापालिका प्रशासनाकडून करण्यात आले आहे.
वाहतूक बदलाची नोंद घेण्याचे आवाहन
लक्ष्मी रस्त्यावरील लिंबराज महाराज चौक ते गरुड गणपती मंडळ दरम्यानची वाहतूक पर्यायी मार्गाने वळविण्यात येणार आहे. लक्ष्मी रस्त्याने टिळक चौकाकडे जाणाऱ्या वाहनचालकांनी लिंबराज महाराज चौकातून (सेवासदन चौक) टिळक चौकाकडे जाणाऱ्या वाहनचालकांनी सेवासदन चौकातून उजवीकडे वळावे. तेथून बाजीराव रस्त्यावरून इच्छितस्थळी जावे. कुमठेकर रस्त्याने लक्ष्मी रस्त्याकडे जाणाऱ्या वाहनचालकांनी चितळे बंधू मिठाईवाले दुकानाजवळून डावीकडे वळून बाजीराव रस्त्याने इच्छितस्थळी जावे. रमणबाग चौकातून उंबऱ्या गणपती चौकाकडे जाणाऱ्या वाहनचालकांनी लक्ष्मी रस्त्याकडे न जाता. केळकर रस्त्याने टिळक चौकाकडे जावे, असे आवाहन वाहतूक शाखेचे पोलीस उपायुक्त विजयकुमार मगर यांनी केले आहे.
