पुणे : पुण्यातील मार्केट यार्ड परीसरातील डॉ. बाबासाहेब आंबेडकर परिसरात टोळक्याने कोयते, तलवार उगारून दहशत माजवल्याची घटना घडली आहे. ही घटना शनिवारी ३० मार्च रोजी रात्री सव्वा नऊ वाजण्याच्या सुमारास गल्ली नंबर १७ मध्ये घडली आहे. टोळक्याने एका तरुणाला जीवे मारण्याची धमकी देत परिसरातील घरांच्या दरवाजावर कोयते आपटून शिवीगाळ केली.
याप्रकरणी मार्केट यार्ड पोलिसांनी राहुल उर्फ लल्या कांबळे (वय १९), शुभम कांबळे (वय २०), डुई ताकतोडे (वय २१), जग्या (चौघे रा. डाॅ. बाबासाहेब आंबेडकरनगर, मार्केट यार्ड) यांच्यासह आठ साथीदारांविरुद्ध गुन्हा दाखल करण्यात आला. याबाबत अरशद इस्माईल बागवान (वय-१९ रा. गल्ली नं. १७, आंबेडकर नगर, मार्केट यार्ड) यांनी मार्केट यार्ड पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, फिर्यादी यांच्या भावाचे आरोपींसोबत वाद झाले होते. याच भांडणाचा राग मनात धरुन आरोपी हातात कोयते, तलवार घेऊन फिर्यादी यांना मारण्यासाठी रात्री त्यांच्या घराजवळ आले. त्यांनी हातातील तलवार आणि कोयते उगारून दहशत माजवली. तसेच लोकांच्या घराच्या दरवाजावर कोयते मारुन आम्ही आंबेडकरनगरचे भाई आहोत कोण मध्ये येईल त्याला तोडतोच असे म्हणून तोडफोड करुन दहशत पसरवली.
बागवानचे वडील, तसेच शेजारी राहणारे शालम शेख यांना कोयत्याचा धाक दाखवून शिवीगाळ केली. घटनेची माहिती मिळताच पोलिसांनी घटनास्थळी धाव घेतली. पसार झालेल्या आरोपींचा शोध घेण्यात येत असून, सहायक पोलीस निरीक्षक मदन कांबळे अधिक तपास करत आहेत.
