दीपक खिलारे
Indapur News : इंदापूर : निरा भिमा कारखान्याकडून आगामी गळीत हंगामामध्ये ६ लाख मेट्रीक टन ऊस गाळपाचे उद्दिष्ट पूर्ण केले जाईल, त्या दृष्टीने नियोजन करण्यात आले आहे. कारखान्याची गळीत हंगामासाठी सर्व यंत्रणा सुसज्ज असल्याची माहिती कारखान्याचे संस्थापक व माजी मंत्री हर्षवर्धन पाटील यांनी सोमवारी (ता. २३) दिली.
दिवाळीसाठी एक पगार बोनस
शहाजीनगर (ता. इंदापूर) येथील निरा भिमा सहकारी साखर कारखान्याच्या सन २०२३-२४ च्या ऊस गळीत हंगामाचा बॉयलर अग्नी-प्रदीपन समारंभ हर्षवर्धन पाटील यांच्या हस्ते उत्साही वातावरणात संपन्न झाला. या वेळी बोलताना हर्षवर्धन पाटील म्हणाले की, निरा-भिमा कारखान्याचे गेली २३ वर्षांमध्ये या परिसराच्या विकासामध्ये मोठे योगदान आहे. (Indapur News) गत हंगामासाठी कारखान्याने शेतकऱ्यांना २,५०० रुपयांप्रमाणे ऊस बिलाची सर्व रक्कम दिली आहे. कारखान्याच्या देय एफ.आर.पी.पेक्षा ही रक्कम २१३ रुपये एवढी जास्त आहे. आगामी गळीत हंगामात साखर उतारा वाढीसाठी शेती विभागाने ऊस तोडणीचे योग्य नियोजन करावे. आगामी गळीत हंगामासाठी काटा पेमेंट करण्याचे नियोजन आहे. कर्मचाऱ्यांचा पगार प्रत्येक महिन्याच्या ५ तारखेला नियमित होत असून, दिवाळीसाठी एक पगार बोनस दिला जाईल, असे हर्षवर्धन पाटील यांनी भाषणात सांगितले.
उपस्थितांचे स्वागत कार्यकारी संचालक हेमंत माने यांनी केले. तर प्रास्ताविक कारखान्याचे अध्यक्ष लालासाहेब पवार यांनी केले. (Indapur News) याप्रसंगी सत्यनारायणाची महापूजा संचालक हरिदास घोगरे व वृंदावना घोगरे या उभयतांच्या हस्ते करण्यात आली.
या वेळी विलास वाघमोडे, उदयसिंह पाटील, राजवर्धन पाटील, कृष्णाजी यादव, दत्तात्रय शिर्के, दत्तू सवासे, प्रताप पाटील, दादासाहेब घोगरे, संजय बोडके, प्रकाश मोहिते, बबन देवकर, भागवत गोरे, चंद्रकांत भोसले, दत्तात्रय पोळ, कमाल जमादार या संचालकांसह देवराज जाधव, सुरेश मेहेर आदी मान्यवर तसेच अधिकारी, कर्मचारी, हितचिंतक उपस्थित होते. सूत्रसंचालन कार्यालयीन अधीक्षक सुभाष घोगरे यांनी केले, तर आभार उपाध्यक्ष कांतीलाल झगडे यांनी मानले.
अधिक बातम्या वाचण्यासाठी येथे क्लिक करा :
Indapur News : मायलेकींचा राहत्या घरात संशयास्पद मृत्यू ; पतीला नातेवाईकांना दिला चोप
