पुणे : येरवडा परिसरात हवेत कोयते फिरवून ‘आम्ही इकडचे भाई आहोत, इथे कोणी थांबायचे नाही’ असे म्हणत परिसरात दहशत पसरवून एकाच्या डोक्यात वार केल्याची घटना नुकतीच घडली आहे. या प्रकरणी येरवडा पोलिसांनी दोघांवर गुन्हा दाखल केला आहे.
याबाबत जैद आक्रम अन्सारी (रा. यशवंत नगर, येरवडा) यांनी येरवडा पोलीस ठाण्यात फिर्याद दिली आहे. यावरून कार्तिक व फुर्त्या (रा. गाडीतळ, येरवडा) यांच्यावर गुन्हा दाखल केला आहे. हा प्रकार शुक्रवारी (ता. २२) रात्री साडेनऊच्या सुमारास नवी खडकी, येरवडा येथे घडला.
पोलिसांनी दिलेल्या माहितीनुसार, फिर्यादी जैद अन्सारी हे त्यांच्या भावाला जेवणाचा डबा देऊन घरी परत येत होते. फिर्यादी हे नवी खडकी येथील रेम्बो बेकरी जवळ आले असता त्यांच्या ओळखीचे आरोपी कार्तिक व फुर्त्या हे हवेत कोयते फिरवत व मोठ्याने आरडाओरड करत आले. ‘आम्ही इकडचे भाई आहोत, येथे कोणी थांबायचे नाही’ असे म्हणून परिसरात दहशत पसरवली. तसेच हातातील कोयता फिर्यादीच्या डोक्यात मारुन गंभीर जखमी केले. एवढ्यावरच न थांबता पुन्हा हातातील कोयते हवेत फिरवून तेथून जात असताना दहशत पसरवली.
यामुळे आजूबाजूचे लोक पळून गेले. या घटनेचा पुढील तपास येरवडा पोलीस करीत आहेत.
