पुणे : पुण्यात एक भीषण अपघाताची घटना समोर आली आहे. एसटी बसची कारला जोरदार धडक होऊन अपघात झाल्याची घटना घडली आहे. या अपघातात एका महिलेचा मृत्यू झाला आहे. तर ६ जण गंभीर जखमी झाले आहेत. पुण्यातील खडकी परीसरात जुन्या मुंबई-पुणे महामार्गवर सकाळी ९ वाजण्याच्या सुमारास हा अपघात घडला आहे. जखमींना उपचारासाठी ससून रुग्णालयात दाखल करण्यात आले आहे.
याबाबत मिळालेल्या माहितीनुसार, जुन्या मुंबई-पुणे महामार्गावर खडकीच्या हद्दीतील बोपोडीमध्ये हा अपघात घडला आहे. सकाळी ९ वाजण्याच्या सुमारास एसटी बस आणि कारची समोरासमोर धडक झाली. अपघातावेळी एसटी बसमध्ये १२ प्रवाशी होते. तर कारमध्ये एकूण सात जण होते. या अपघातात कारमधील एका महिलेचा मृत्यू झाला आहे. तर उर्वरित ७ जण गंभीर जखमी झाले आहेत. या अपघातात एसटीमधील बारा प्रवासी किरकोळ जखमी झाले आहेत. चालकाचे बसवरील नियंत्रण सुटल्याने हा अपघात झाल्याची प्राथमिक माहिती समोर आले आहे.
या घटनेची माहिती मिळताच पोलिसांनी घटनास्थळी धाव घेत अपघातातील जखमींना तात्काळ ससून रुग्णालयात दाखल करण्यात आले. यातील सहा जणांची प्रकृती गंभीर आहे. हा अपघात इतका भीषण होता की यामध्ये कारचा अक्षरश: चक्काचूर झाला आहे. या अपघातानंतर जुन्या मुंबई-पुणे महामार्गवर मोठी वाहतूक कोंडी झाली होती.
