हडपसर, (पुणे) : पुण्यात गुन्हेगारीच्या घटनांमध्ये सातत्याने वाढ होताना दिसत आहे. त्यात खून, खुनाचा प्रयत्न, महिलांवरील अत्याचाराच्या घटना लक्षणीय आहेत. असे असताना पुण्यातील हडपसर येथे जीवे मारण्याची धमकी देऊन ‘लिव्ह इन रिलेशनशिप’मध्ये राहणाऱ्या एकाने तरुणीचे न्यूड फोटो व्हायरल केल्याची खळबळजनक घटना घडली.
अनिलकुमार सिद्धनाथ झा असे गुन्हा दाखल झालेल्या व्यक्तीचे नाव आहे. गेल्या दोन वर्षांपासून पीडित तरुणी अनिलकुमार याच्यासोबत ‘लिव्ह इन रिलेशनशिप’मध्ये राहत होती. पण ऑगस्टपासून ते दोघे वेगळे झाले. त्यामुळे आरोपी अनिलकुमार हा पीडित तरूणीला वारंवार फोन करुन जीवे मारण्याची धमकी देत असायचा. इतकेच नाहीतर त्याने दोघे एकत्र असताना काढलेले न्यूड फोटो तरुणीच्या ऑफिसच्या सहकाऱ्यांना पाठवले.
या सर्व प्रकारानंतर अखेर पीडित तरूणीने पोलिस ठाणे गाठत अनिलकुमार झा याच्याविरोधात फिर्याद दिली. या फिर्यादीवरून हडपसर पोलिसांनी आरोपी अनिलकुमार याच्याविरोधात विविध कलमान्वये गुन्हा दाखल केला असून, पुढील तपास पोलीस निरीक्षक (गुन्हे) संदीप शिवले करत आहेत.
