पिंपरी : पिंपरी- चिंचवड शहरातून माणुसकीला काळीमा फासणारी घटना समोर आली आहे. भरधाव टेम्पोने दुचाकीला धडक दिल्याने दुचाकीवरील महिला रस्त्यावर पडली. यावेळी बसचे चाक डोक्यावरून गेल्याने महिलेचा जागीच मृत्यू झाला. त्यानंतर महिलेचा मृतदेह रुग्णवाहिकेतून चाकण ग्रामीण रुग्णालयात नेण्यात आला. दरम्यान, अज्ञात चोरट्याने महिलेच्या मृतदेहाच्या गळ्यातील पाच तोळे सोन्याचे मंगळसूत्र चोरून नेल्याचा धक्कादायक प्रकार उघडकीस आला आहे.
मंगल वसंतराव गाडे (५४, रा. येलवाडी, ता. खेड) असे अपघातात मृत्यू झालेल्या महिलेचे नाव आहे. त्यांचे पती वसंतराव भिकाजी गाडे (६९, रा. येलवाडी, ता. खेड) यांनी या प्रकरणी चाकण पोलिस ठाण्यात फिर्याद दिली आहे. त्यानुसार, टेम्पो ट्रॅव्हलवरील अज्ञातचालक आणि अज्ञात इसमाविरोधात गुन्हा दाखल करण्यात आला आहे. पुणे-नाशिक रस्त्यावर वाकी खुर्द गावाच्या हद्दीत ७ डिसेंबर रोजी हा अपघात घडला.
नेमकं काय घडलं?
पोलिसांनी दिलेल्या माहितीनुसार, फिर्यादी वसंतराव गाडे आणि त्यांच्या पत्नी मंगल गाडे हे वाकी खुर्द येथून चाकणकडे निघाले होते. त्यावेळी भरधाव वेगात आलेल्या टेम्पो ट्रॅव्हल्सने त्यांच्या दुचाकीला जोरदार धडक दिली. धडक दिल्यानंतर दोघेही पती-पत्नी रस्त्यावर पडले. त्या वेळी मंगल गाडे यांच्या डोक्यावरून टेम्पो ट्रॅव्हल्सचे चाक गेले. या अपघातात मंगल गाडे यांचा जागीच मृत्यू झाला.
या अपघातानंतर जखमी पती आणि मृत पत्नीचा मृतदेह नेण्यासाठी रुग्णवाहिकेला पाचारण करण्यात आले. त्या वेळी मयत पत्नीच्या गळ्यात पाच तोळे वजनाचे सोन्याचे मंगळसूत्र होते. मात्र, मयत गाडे यांचे नातेवाईक त्यांचा मृतदेह पाहण्यासाठी चाकण ग्रामीण रुग्णालयात गेले असता मृतदेहाच्या गळ्यातील मंगळसूत्र अज्ञात व्यक्तीने चोरून नेल्याचे त्यांच्या निदर्शनास आले.
याबाबत बोलताना चाकण पोलीस ठाण्याचे पोलिस उपनिरीक्षक राजेश मोरे म्हणाले कि, गाडे यांच्या दुचाकीला धडक देणाऱ्या वाहनाची माहिती मिळाली असून, चालकाला अटक करण्यासाठी पोलिसांचे पथक रवाना करण्यात आले आहे. तसेच, मृतदेहाच्या गळ्यातील मंगळसूत्र कोणी चोरून नेले, याचा देखील तपास सुरू आहे. घटनास्थळी उपस्थित असणाऱ्या काही लोकांवर पोलिसांचा संशय असून लवकरच आरोपी पकडण्यात येईल.
