वाघोली : शहरातील घरफोडी प्रकरणात फरार असलेल्या आरोपीला गुन्हे शाखा युनिट 6 च्या पथकाने अटक केली आहे. त्याच्याकडून सुमारे 1 लाख 80 हजार रुपयांचा सोन्याचा मुद्देमाल हस्तगत केला आहे. चोरलेले दागिने गोल्ड सेल्समनला विकणाऱ्या दोन सोनारांही पथकाने अटक केली आहे.
सुफियान मोहम्मद सिद्दीकी अन्सारी (वय 21, रा. चुडामन तालीम, भवानी पेठ) असे घरफोडीतील आरोपीचे नाव आहे तर जितेंद्र किरणराज ओसवाल (वय-40, गोल्ड सेल्समन, काळेवाडी) व संजय हरेंद्रनाथ मंडल (वय -46, गोल्डस्मिथ, पिंपरी) असे चोरीचे सोने खरेदी करणाऱ्या दोघांची नावे आहेत. याप्रकरणी गुन्हे शाखा युनिट 6 च्या पथकाने तिघांना अटक केली आहे.
पोलिसांनी दिलेल्या माहितीनुसार, बुधवारी (ता. 08) गुन्हे शाखा युनिट 6 चे पथक युनिट हद्दीत गस्त घालत असताना ऋषीकेश ताकवणे आणि सचिन पवार यांना गुप्त माहिती मिळाली की, सुफियान सिद्दीकी अन्सारी हा खडक पोलीस ठाण्यातील दाखल गुन्ह्यातील चोरीचा सोनेरी मुद्देमाल विक्रीसाठी भाजी मंडई, गाडीतळ, हडपसर परिसरात येणार आहे. त्यावर पथकाने सापळा रचून सुफियान याला ताब्यात घेतले.
दरम्यान, या कारवाईत 10 ग्रॅम व 5 ग्रॅम वजनाची दोन बिस्किटे अंदाजे रक्कम 1 लाख 80 हजार रुपये जप्त करण्यात आली आहेत. त्याच्याकडे अधिक चौकशी केली असता त्याने नमूद गुन्ह्यातील इतर 65 ग्रॅम सोन्याचे दागिने हे काळेवाडी येथील गोल्ड सेल्समन जितेंद्र ओसवाल व पिंपरी येथील गोल्डस्मिथ संजय मंडल यांना विकल्याची माहिती दिली. त्यानंतर या दोघांनाही अटक करण्यात आली आहे. सर्व आरोपींची वैद्यकीय तपासणी करून त्यांना पुढील चौकशीसाठी खडक पोलीस ठाण्याच्या ताब्यात देण्यात आले आहे.
सदरची कामगिरी वरिष्ठांचे मार्गदर्शनाखाली प्रभारी पोलीस निरीक्षक वाहीद पठाण, सहायक पोलीस निरीक्षक मदन कांबळे, सारंग दळे, ऋषिकेश ताकवणे, सचिन पवार, ऋषीकेश व्यवहारे, सुहास तांबेकर यांचे पथकाने केलेली आहे.
