“पुणे प्राईम न्यूज” इम्पॅक्ट, हवेली मोजणी कार्यालयातील गैरप्रकारांचा ‘कोथळा’ बाहेर, दुसरा गुन्हा दाखल….

संदीप बोडके

हवेली (पुणे): हवेली मोजणी कार्यालयातील “हेलीकॉप्टर शॉट टीम” मधील भूकरमापक विरेंद्र कोकरे यांच्यावरही येरवडा पोलिस ठाण्यात गुन्हा दाखल झाल्याने मोठी खळबळ उडाली आहे. जागेवर न जाता ऑफिसमध्ये बसून ‘क’ प्रत तयार करणे, तसेच चुकीच्या मोजणीवरुन अधिकारी व कर्मचारी यांच्यावर आणखी एक दुसरा गुन्हा दाखल झाला आहे. यामुळे मोजणी कार्यालयातील गैरप्रकारांचा ‘कोथळा’च बाहेर निघाला आहे.

“सरकारी मोजणीच्या तारखेअगोदरच दिली क प्रत; हवेलीच्या मोजणी कार्यालयाचा आणखी एक कारनामा उघड” या मथळ्याखाली ‘पुणे प्राईम न्यूज’ ने नुकतीच बातमी प्रकाशित केली होती. यामुळे मोजणी कार्यालयातील गैरप्रकार बाहेर आला आहे. या बातमीची दखल घेत, चौकशीअंती उपअधिक्षक अमरसिंह पाटील व भूकरमापक विरेंद्र कोकरे यांच्यावर नुकताच गुन्हा दाखल झाला आहे.

पिंपरी सांडस येथील मोजणीत फेरफार केल्याने गुन्हा दाखल

मौजे पिंपरी सांडस (ता.हवेली) येथील मोजणी प्रकरणात गुन्हा दाखल झाला आहे. येथील गट नबंर 427 च्या अतितातडी हद्द कायम मोजणीमध्ये, मोजणी रजिस्टर नबंर 12025 बाबत हा प्रकार संबंधित टीमने केला आहे. ही मोजणी तरटे नावाच्या भूकरमापकाकडे होती. तसेच त्या मोजणीची तारीख 6 जून 2024 अशी होती. या मोजणी प्रकरणात सहधारक व लगतधारक शेतकऱ्यांना कोणत्याही नोटीसा बजावलेल्या नाहीत. मात्र, असे असताना विरेंद्र कोकरे या भूकरमापकाने 6 जून ऐवजी 3 एप्रिल 2024 ला मोजणी केली. तसेच तात्काळ 5 एप्रिलला ‘क’ प्रत दिल्याचे कार्यालयीन रजिस्टरला नमूद आहे. संबंधित मोजणी ही कोकरे भूकरमापकाकडे नसतानाही त्याने हा पराक्रम केला आहे.

भूकरमापक किरण येटाळे व विरेंद्र कोकरे सेटींगमधील मोजण्यांचे मास्टर माईंड
निलंबित उपअधीक्षक अमरसिंह पाटील यांचे राईट लेफ्ट सर्व्हेअर म्हणून येटाळे व कोकरे यांची खास ओळख आहे. त्यामुळे त्यांनी केलेल्या सर्व सेटींगमधील मोजण्या रडारवर आल्या आहेत. मोजणी तारखेच्या अगोदरच मोजणी करुन फक्त दोन ते तीन दिवसांत ‘क’ प्रत देण्यात त्यांचा हातखंडा आहे. सर्वांत जलद मोजणी करुन ‘क’ प्रत देण्यात संबंधित सर्व्हेअरची मास्टरमाईंड म्हणून ख्याती आहे. त्यांनी केलेल्या पराक्रमामुळे कार्यालयातील इतरही भूकरमापक चौकशीच्या फेऱ्यात सापडले आहेत.

हवेली मोजणी कार्यालयाचा ऑनलाईन व ऑफलाईनचा वेगळाच खेळ सुरू आहे. संबंधित मोजणीला मी हरकत नोंदवली होती. मात्र, कार्यालयातील मुख्यालय सहाय्यक विजय साबळे यांनी माझा हरकत अर्ज लपवून ठेवला. मोजणीच्या तारखे अगोदरच अर्जदाराला ‘क’ प्रत दिली गेली. गुन्हा दाखल झाल्याने चौकशीत व तपासामध्ये आणखी इतर बाबी समोर येतील. तसेच कोणी संगनमताने कट कारस्थान केले आहे, हे ही समोर येईल. त्यानुसार यातील आरोपींच्या संख्येत निश्चित वाढ होईल, अशी अपेक्षा आहे.
– स्वप्नील भोरडे, तक्रारदार शेतकरी

पालखी महामार्ग संपादन मोजणीत चुकीचं काम करणाऱ्या भूकरमापकावर गुन्हा दाखल होणार का ?

मौजे फुरसुंगी येथील रस्ता रुंदीकरण संपादन मोजणीत लाभार्थ्यांना कोट्यावधी रुपयांचा फटका बसला आहे. चुकीच्या वहिवाट मोजणीमुळे बोगस लाभार्थ्यांनी शासनाच्या कोट्यावधी रुपयांवर हात साफ केला आहे. खऱ्या लाभार्थ्यांना अजूनही संपादित जागेचा मोबदला मिळाला नाही. मोजणीमध्ये चुकीची वहिवाट दाखवल्याने हा प्रकार समोर आला आहे. आमच्या कुटुंबाची जागा रस्ता रुंदीकरणात संपादित झाली आहे. त्याचा मोबदला तात्काळ मिळावा. तसेच प्रकरणाची सखोल चौकशी करून संबंधितांवर गुन्हा दाखल करण्याची मागणी हर्षवर्धनराव हरपळे यांनी केली आहे.