पुणे : पुण्यातील वानवडी परीसारतील ऑक्सफर्ड कंफोर्ट सोसायटीमध्ये एका मद्यधुंद तरुणीनं चांगलाच राडा घातला आहे. ही घटना 31 डिसेंबरच्या रात्री घडली. या तरुणीने सोसायटीचं गेट बंद करून उपद्रव केला. संतापलेल्या सोसायटीतील रहिवाशांनी पोलिसांना बोलावल्यानंतर तिनं महिला पोलीस कर्मचाऱ्यांना देखील मारहाण केली आहे. तसेच सोसायटीच्या मालमत्तेची तोडफोड केली, असं रहिवाशांंचं म्हणणं आहे.
पोलिसांनी तरुणीला ताब्यात घेतलं. मात्र, संबंधित तरुणी एका बड्या पोलीस अधिकाऱ्याची मुलगी असल्यानं तिला लगेच सोडून देण्यात आलं, असं सोसायटीतील रहिवाशांनी सांगितलं. तसेच पुढे तयांनी सांगितलं कि 31 डिसेंबरच्या रात्री संपूर्ण देशभरात नववर्षाच्या स्वागताची तयारी सुरू होती. ठिकठिकाणी तरुण-तरुणींसोबत सर्वांनीच जल्लोषात सरत्या वर्षाला निरोप देत नवीन वर्षाचं स्वागत केलं. याच दरम्यान या तरुणीने मद्यधुंद अवस्थेत सोसायटीमध्ये येऊन प्रचंड गोंधळ घातल्याची माहिती दिली.
पुण्यात 31 डिसेंबरला अनेक ठिकाणी पार्टीचं आयोजन करण्यात आलं होतं. यातच या मद्यधुंद तरुणीचा व्हिडीओ चांगलाच व्हायरल झाला आहे. हा राडा पाहून अनेकांनी तरुणीला आवरण्याचा प्रयत्न केला, मात्र तरुणी आवरत नसल्याने पोलिसांना फोन करुन यासंदर्भात माहिती दिली गेली. पोलीस आल्यानंतर तरुणीने पोलिसांना देखील मारहाण केल्याचं बोललं जात आहे. या घटनेचा व्हिडीओ सीसीटीव्ही कॅमेऱ्यात कैद झाला आहे.
