पुणे : सर्वसामान्य माणसांकडून लाच मागण्याच्या प्रकारात मोठी वाढ होत आहे. त्यामुळे अनेक अधिकारी, कर्मचारी लाचलुचपत विभागाच्या जाळ्यात सापडत आहेत. मात्र, पुणे जिल्ह्यातील जुन्नर तालुक्यातील एका वकिलाकडून लाच मागण्याचा प्रकार उघडकीस आला आहे. या वकिलावर लाचलुचपत प्रतिबंधक विभागाने गुन्हा दाखल केला आहे. गुन्ह्यात अटक झालेल्या मुलाला लवकर जामीन मिळवून देतो. त्यासाठी पोलीस अधिकाऱ्याला पैसे द्यावे लागतील, असे सांगून २० हजार रुपयांची लाच मागणाऱ्या वकिलावर गुन्हा दाखल झाला आहे.
शिवम गजानन नायकोडी (वय ३०, रा. जुन्नर) असे या वकिलाचे नाव आहे. लाच मागितल्यानंतर तक्रारदारांनी लाचलुचपत प्रतिबंधक विभागाकडे तक्रार केली होती. त्याची पडताळणीही झाली होती. मात्र, कारवाई दरम्यान तक्रारदाराचे निधन झाले. त्यामुळे कारवाई होऊ शकली नाही. परंतु, लाच मागितली गेल्याने गुन्हा दाखल करण्यात आला आहे.
याबाबत पोलिसांनी दिलेल्या माहितीनुसार, तक्रारदार हे ७० वर्षांचे असून, त्यांच्या मुलाला खूनाचा प्रयत्न केल्याच्या गुन्ह्यात जुन्नर पोलिसांनी अटक केली आहे. या प्रकरणात त्यांचे वकिल शिवम नायकोडी हे होते. नायकोडी यांनी तुमच्या मुलाला लवकर जामीन मिळवून देतो, असे तक्रारदार यांना सांगितले. मात्र, मुलाला सोडवण्यासाठी तपास अधिकाऱ्याला २५ हजार रुपये द्यावे लागतील, असे सांगितले.
दरम्यान, या प्रकरणी तक्रारदाराला संशय आला. त्यांनी लाच लुचपत प्रतिबंधक विभागाकडे याबाबत तक्रार केली. त्याची ९ डिसेंबर रोजी पडताळणी केली असता वकिलाने तपासी अधिकाऱ्याला २० हजार रुपये द्यावे लागतील असे सांगून तक्रारदाराकडे पंचांसमक्ष २० हजार रुपयांची मागणी केल्याचे निष्पन्न झाले.
दरम्यानच्या काळात तक्रारदारांचे निधन झाल्याने पुढील कारवाई होऊ शकली नाही. मात्र, लाचलुचपत प्रतिबंधक विभागाने जुन्नर पोलीस ठाण्यात लाचेची मागणी केल्याचा गुन्हा दाखल केला आहे.
