Daund News : दौंड तालुक्यातील कानगाव ते नवीन गार रस्त्यावर बेकायदेशीर जमाव जमवून सार्वजनिक वाहतुकीला अडथळा निर्माण केल्याप्रकरणी 17 जणांविरुद्ध दौंड पोलीस ठाण्यात गुन्हा दाखल करण्यात आला आहे. पोलिसांनी जमावाला पांगण्याचा आदेश देऊनही आंदोलकांनी आपले कृत्य सुरूच ठेवल्याने ही कायदेशीर कारवाई करण्यात आली आहे. यामध्ये महिलांचाही मोठ्या प्रमाणावर समावेश आहे.
आकाश दिलीप पायगुडे, अजय रावसाहेब जाधव, विशाल दादा चौरे, बाळासाहेब शामराव विटकर, बापू पांडुरंग येडे, कमरुद्दीन इस्माईल शेख, दत्ता माणी पाडोळे, लता दिलीप येडे, सुरेखा विलास येडे, वच्छला बाबुराव चौरे, द्रोपदा हरीभाऊ वायसे, कमल बापू येडे, चांगुणा नागनाथ येडे, आणि सार्थक महादेव चौरे (सर्व रा. येडेवस्ती, नवीन गार, ता. दौंड) अशी गुन्हा दाखल करण्यात आलेल्यांची नावे आहेत. याप्रकरणी पोलीस शिपाई प्रविण किसन राऊत यांनी फिर्याद दिली आहे.
पोलिसांनी दिलेल्या माहितीनुसार, 8 एप्रिल 2026 रोजी दुपारी 4 ते रात्री 9 वाजण्याच्या सुमारास येडेवस्ती (नवीन गार) येथील रस्त्यावर हा प्रकार घडला. आकाश दिलीप पायगुडे याने अन्य 16 जणांना एकत्र करून बेकायदेशीर जमाव जमवला. या जमावाने रस्त्यावर ठाण मांडल्यामुळे सार्वजनिक वाहतूक व्यवस्था पूर्णपणे कोलमडली होती आणि येणाऱ्या-जाणाऱ्या वाहनांना अडवून धरण्यात आले होते.
घटनेची माहिती मिळताच दौंड पोलीस स्टेशनचे पथक घटनास्थळी दाखल झाले. पोलिसांनी जमावाला रस्ता मोकळा करण्याच्या आणि पांगण्याच्या सूचना वारंवार दिल्या. मात्र, आंदोलकांनी पोलिसांच्या आदेशाकडे दुर्लक्ष करून आपले आंदोलन आणि बेकायदेशीर कृत्य सुरूच ठेवले.
दरम्यान, दौंड पोलिसांनी या सर्वांविरुद्ध भारतीय न्याय संहिता (BNS) 2023 आणि महाराष्ट्र पोलीस अधिनियम कायद्याच्या विविध कलमान्वये गुन्हा दाखल केला आहे. पोलीस हवालदार बोराडे या प्रकरणाचा पुढील तपास करत आहेत.
