Loni kalbhor : अत्यंत प्रतिकूल परिस्थितीतही स्वप्नांचा पाठलाग करत यशाचे शिखर गाठता येते, याचे जिवंत उदाहरण म्हणजे कदमवाकवस्ती (ता. हवेली) येथील मोनाली गोविंद जाधव. भाजी विक्री करणारे वडील आणि शेतमजुरी करणारी आई अशा साध्या कुटुंबातून आलेल्या मोनालीने जिद्द, चिकाटी आणि अथक परिश्रमांच्या जोरावर पुणे शहर पोलीस दलात कॉन्स्टेबल पद मिळवत कुटुंबाचे स्वप्न साकार केले आहे.
राजगृह कॉलनीतील अवघ्या दहा बाय दहाच्या भाड्याच्या खोलीत मोनालीचे कुटुंब वास्तव्यास आहे. आर्थिक परिस्थिती नाजूक असतानाही तिच्या आई-वडिलांनी मुलीच्या शिक्षणात कधीही खंड पडू दिला नाही. वडील गोविंद जाधव दिवस-रात्र कष्ट करून भाजी विक्रीचा व्यवसाय करत कुटुंबाचा उदरनिर्वाह करतात, तर आई रेखा जाधव शेतात मजुरी करून संसाराला हातभार लावतात. अशा संघर्षमय वातावरणात वाढलेल्या मोनालीने लहानपणापासूनच ‘पोलीस व्हायचे’ हे स्वप्न मनाशी बाळगले होते.
मोनाली चे प्राथमिक आणि माध्यमिक शिक्षण लोणी काळभोरमध्येच झाले. सध्या ती हडपसर येथील एस. एम. जोशी विद्यालयात कला शाखेच्या तृतीय वर्षात शिक्षण घेत आहे. सुरुवातीला पोलीस भरती प्रक्रियेबद्दल तिला फारशी माहिती नव्हती. मात्र महाविद्यालयातील मित्रमैत्रिणींच्या मार्गदर्शनातून तिने या क्षेत्राची माहिती घेतली आणि त्यासाठी ठामपणे तयारी सुरू केली. आई-वडिलांचा भक्कम पाठिंबा मिळाल्यानंतर मोनालीने प्रशिक्षणासाठी श्री अकॅडमीत प्रवेश घेतला. सकाळी लवकर उठून धावणे, व्यायाम, शारीरिक कसरती आणि दिवसभर अभ्यास असा तिचा कठोर दिनक्रम सुरू झाला.
घरची जबाबदारी सांभाळत आणि शिक्षण सुरू ठेवत तिने कोणतीही तडजोड न करता स्वतःला पूर्णपणे तयारीत झोकून दिले. या मेहनतीचे फळ तिला पुणे शहर पोलीस भरती प्रक्रियेत मिळाले. शारीरिक क्षमता चाचणीत तिने 50 पैकी 47 गुण मिळवत उत्कृष्ट कामगिरी केली, तर लेखी परीक्षेत 100 पैकी 79 गुण मिळवले. एकूण 126 गुणांसह खुल्या प्रवर्गातील 125 गुणांच्या मेरिटमध्ये स्थान मिळवत तिने पोलीस कॉन्स्टेबल पदावर आपली निवड निश्चित केली.
मुलगी पोलीस झाली, ही आनंदाची बातमी कळताच आई-वडिलांचा आनंद गगनात मावेनासा झाला. वर्षानुवर्षे कष्ट करून मुलीला उभे करण्याचे स्वप्न अखेर साकार झाल्याने त्यांच्या डोळ्यांत अभिमानाचे अश्रू तरळले.
मोनाली जाधवची ही यशोगाथा केवळ तिच्या कुटुंबासाठीच नव्हे, तर संपूर्ण समाजासाठी प्रेरणादायी ठरत आहे. तिच्या जिद्दीने पुन्हा एकदा सिद्ध केले आहे की, परिस्थिती कितीही कठीण असली तरी इच्छाशक्ती आणि मेहनत असेल, तर कोणतेही स्वप्न अशक्य नाही. मोनालीच्या यशामुळे कदमवाकवस्ती परिसरातही आनंदाचे वातावरण निर्माण झाले असून, तिच्यावर अभिनंदनाचा वर्षाव होत आहे. साध्या कुटुंबातून येऊन मोठे यश मिळवणाऱ्या मोनालीने अनेक तरुण-तरुणींना प्रेरणा दिली आहे.
यावेळी बोलताना मोनाली म्हणाली, “माझ्या यशामागे माझ्या आई-वडिलांचे मोठे योगदान आहे. त्यांनी खूप कष्ट केले, त्याग केला. कोणतेही स्वप्न पूर्ण करायचे असेल तर त्यासाठी सातत्याने मेहनत आणि चिकाटी आवश्यक असते. अपयश आले तरी हार मानू नका. प्रामाणिक प्रयत्न करत राहिलात, तर यश नक्की मिळते.”
