पुणे: पुण्यात सायबर फसवणुकीचे प्रमाण दिवसेंदिवस वाढत आहे. असाच सायबर फसवणुकीचा गुन्हा पुणे पोलिसांनी उघडकीस आणला आहे. याप्रकरणी एका सायबर भामट्याला अटक करण्यात आली आहे. तुषार हरिश्चंद्र वाजंत्री (वय २८ वर्ष, रा. कोकबन, रोहा, जिल्हा रायगड) असे या सायबर चोरट्याचे नाव आहे.
तुषार हा बांधकाम व्यवसायिक आहे. त्याचे राष्ट्रवादी काँग्रेसच्या एका ज्येष्ठ नेत्याशी संबंध आहेत. तुषारची पत्नी गावाची सरपंच आहे. त्याने डिजिटल अरेस्टची भीती दाखवून देशभरातील नागरिकांकडून कोट्यवधी रुपये उकळल्याचे उघडकीस आले आहे.
याबाबत अधिक माहिती अशी की, तुषार वाजंत्री याने पुण्यातील एका ज्येष्ठ नागरिकाशी पोलिस असल्याचे भासवत संपर्क साधला. त्यानंतर मनी लॉन्ड्रिंग प्रकरणात कारवाईची करण्याची भीती दाखवत ६ कोटी २९ लाख रुपये उकळले. ही रक्कम १ ते १९ नोव्हेंबर दरम्यान आरोपी तुषारच्या खात्यात जमा करण्यात आली. फसवणूक लक्षात आल्यानंतर शिवाजीनगर सायबर पोलिस ठाण्यात तक्रार दाखल करण्यात आली आहे.
आरोपी तुषारने काही रक्कम बँकेत मुदतठेवीच्या स्वरूपात ठेवली होती. रक्कम ठेवलेले संबंधित बँक खाते ‘धावीर कन्स्ट्रक्शन’ या कंपनीच्या नावावर असून, हे खाते कोकबन येथील आहे. याप्रकरणी पोलिसांनी तुषारला अटक करण्यासाठी कोकबनमध्ये छापा टाकला, मात्र तुषारने आपल्या राजकीय प्रभावाचा वापर करत तेथून वेळीच पळ काढला. त्यानंतर अखेर पोलिसांनी त्याला पनवेल येथे अटक केली.
त्याचा अधिक तपास केला असता तुषारने आणखी ५ जणांची फसवणूक केल्याचे उघडकीस आले आहे. या सायबर फसवणुकीच्या प्रकरणात केरळ पोलिसांनाही तुषारचा शोध होता. न्यायालयाने त्याला ५ दिवसांची पोलिस कोठडी सुनावली आहे.
