पुणे: हुंडा पद्धत नष्ट करण्यासाठी एक महत्त्वपूर्ण पाऊल उचलत, पुण्यातील धायरी येथील ग्रामस्थांनी एकत्रितपणे विवाहांमध्ये हुंडा आणि इतर अनिष्ट प्रथांवर बंदी घालण्याचा निर्णय घेतला आहे. हुंड्यामुळे अनेक विवाहित महिलांनी आयुष्य संपवलं आहे. दरम्यान, हुंड्याची अनिष्ट प्रथा मोडीस काढण्यासाठी पुण्यातील काही ग्रामस्थांनी पुढाकार घेतला आहे. अठरापगड जातीच्या ग्रामस्थांनी ग्रामसभेत भाग घेतला होता. सर्वांनी हुंडा घेणार नसल्याचा ठराव एकमताने मंजूर केला आहे.
गावकऱ्यांनी ग्रामसभेत, कोणताही हुंडा दिला जाणार नाही किंवा घेतला जाणार नाही, कमीत कमी खर्चात विवाह केला जाणार, लग्नापूर्वी केले जाणारे प्री-वेडिंग टाळले जातील, लग्न पत्रिका पहिली नाही तरी चालेल परंतु लग्नापूर्वी जोडप्याची आरोग्य तपासणी अनिवार्य असेल, कोणतेही भव्य समारंभ किंवा स्वागत समारंभ आयोजित केले जाणार नाहीत, लग्नादरम्यान कोणत्याही भेटवस्तू किंवा आर्थिक व्यवहारांवर चर्चा केली जाणार नाही किंवा त्यावर भर दिला जाणार नाही, छळ होत असल्यास मुलीला सासरी पाठवायचे नाही, लग्न वेळेतच लावावीत, एकाच दिवशी साखरपुडा, जेवणामध्ये मोजकेच पदार्थ करावेत असा निर्णय या ग्रामसभेत घेण्यात आला आहे.
गावकऱ्यांनी संपूर्ण गावात ठराव लिहिलेले फलक लावण्याचा निर्णय घेतला आहे. तसेच नियमांचे पालन करणाऱ्यांचा सत्कार करण्याचा निर्णय घेण्यात आला आहे. नको त्या प्रथा बंद करून मुलगा आणि मुलगी कसे सुखी राहतील याचा विचार करावा, असा ठरावच या ग्रामसभेत करण्यात आला आहे. दरम्यान, नियमांचे पालन करण्याची सक्ती करण्यात आलेली नाही. मात्र लोकांनी हे नियम पाळावे, असे आवाहन यावेळी करण्यात आले आहे.
