पुणे : सोमेश्वर सहकारी साखर कारखान्याच्या 2026-27 ते 2030-31 या पंचवार्षिक निवडणुकीची धामधूम सध्या जोरात सुरू आहे. या निवडणुकीच्या रणधुमाळीत पुरुषोत्तम जगताप यांच्या पॅनेलला उपमुख्यमंत्री अजित पवार यांचे नाव किंवा छायाचित्र वापरण्यास निवडणूक निर्णय अधिकाऱ्यांनी पूर्णपणे मनाई केली आहे. या नियमाचे उल्लंघन झाल्यास कायदेशीर कारवाई केली जाईल, असा स्पष्ट इशारा देण्यात आला आहे.
दिवगंत उपमुख्यमंत्री अजित पवार यांचे चिरंजीव जय पवार आणि राजवर्धन शिंदे यांनी यासंदर्भात अधिकृत हरकत नोंदवली होती. प्रचारामध्ये अजितदादा पवार यांचे नाव, फोटो आणि प्रतिमा असलेले बॅनर, पोस्टर्स, डिजिटल फलक व स्टिकर्स वापरले जात असल्याची तक्रार त्यांनी केली होती. या तक्रारीची दखल घेत निवडणूक निर्णय अधिकारी दिग्विजय आहेर यांनी पुरुषोत्तम जगताप यांना लेखी नोटीस पाठवली आहे.
त्यानुसार अजित पवार यांचे नाव, छायाचित्र किंवा प्रतिमा असलेले सर्व फलक, पोस्टर्स, पत्रके व स्टिकर्स यांचा प्रचार मधील वापर तत्काळ थांबवावा.हा नियम सर्व मुद्रित, इलेक्ट्रॉनिक आणि डिजिटल माध्यमांतील प्रचार साहित्याला समान रीतीने लागू राहील असे आयोगाने स्पष्ट केले आहे.आतापर्यंत वापरण्यात आलेल्या अशा सर्व साहित्यावर योग्य ती कारवाई करून त्याचा लेखी अहवाल निवडणूक कार्यालयाकडे सादर करावा.निवडणूक नियमांचे उल्लंघन केल्यास संबंधित व्यक्तींवर कडक कायदेशीर पावले उचलली जातील असे सांगण्यात आले आहे.
निवडणूक प्रक्रिया पारदर्शक आणि सुरळीत पार पाडण्यासाठी सर्व पॅनेल आणि उमेदवारांनी या आदेशाचे काटेकोरपणे पालन करणे बंधनकारक आहे. या निर्णयामुळे सोमेश्वर कारखान्याच्या निवडणूक प्रचाराला आता एक वेगळे वळण मिळाले आहे.
