Crime News: सोलापूर : सोलापूर जिल्ह्यातील दक्षिण सोलापूर (Solapur) तालुक्यात एक धक्कादायक हत्या (Murder) प्रकरण समोर आले आहे. इंगळगी गावात भरदिवसा शेतात ही घटना घडली. 55 वर्षांचे सिकंदर मुलका शेख हे मंगळवारी सकाळी सुमारे 11:30 वाजता आपल्या शेतात काम करत होते. त्यावेळी त्यांचा जावई सादिक दफेदार तेथे आला. काही महिन्यांपासून सुरू असलेल्या कौटुंबिक वादातून त्याने सासऱ्यावर धारदार शस्त्राने हल्ला केला. अचानक झालेल्या या हल्ल्यात सिकंदर शेख यांचा गळा चिरण्यात आला आणि ते जागीच कोसळले. त्यांचा मृत्यू घटनास्थळीच झाला.
माहितीनुसार, सादिक आपल्या पत्नीवर संशय घेत होता. ती मुंबई पोलीस दलात कॉन्स्टेबल म्हणून कार्यरत आहे. संशयातून तो वारंवार तिच्याशी वाद घालत होता. या प्रकारामुळे पत्नीने घटस्फोटासाठी अर्ज दाखल केला होता. याच रागातून सादिकने सासऱ्याची हत्या केल्याचा प्राथमिक अंदाज पोलिसांनी व्यक्त केला आहे.
घटनेनंतर आरोपी पळून जाण्याच्या तयारीत होता. मात्र शेजारील शेतकऱ्यांना संशय आल्याने त्यांनी त्याला पकडण्याचा प्रयत्न केला. त्यावेळी सादिकने स्वतःच्या छातीवर वार करून आत्महत्येचा प्रयत्न केला. सध्या त्याच्यावर शासकीय रुग्णालयात उपचार सुरू आहेत. या प्रकरणाचा पुढील तपास वळसंग पोलीस करत आहेत.
