जुन्नर: पुणे जिल्ह्यातील जुन्नर तालुक्यात बोरी बुद्रुक येथे मध्यरात्री दोनच्या सुमारास अज्ञात दरोडेखोरांनी राजेंद्र कोरडे यांच्या घरात घुसून शस्त्राच्या धाकावर सोन्या-चांदीच्या दागिन्यांची लूट केली. चोरट्यांनी राजेंद्र कोरडे यांच्यावर काठीने हल्ला केला आणि घरातील सदस्यांच्या मानेवर कोयते लावले. “ओरडलात तर कापून टाकू,” अशी धमकी देत दरोडेखोरांनी संपूर्ण कुटुंबाला एका खोलीत डांबले आणि घरातील सर्व सोन आणि ऐवज लंपास केला.
नेमकं काय घडलं?
राजेंद्र कोरडे हे आपल्या कुटुंबासह शेतात घर बांधून राहतात. मध्यरात्री गाढ झोपेत असताना, चोरट्यांनी घराच्या मुख्य दरवाजावर मोठा दगड फेकून तो तोडला. आवाजाने कुटुंब जागे झाले, पण समोरचे दृश्य पाहून सगळेच घाबरले. चोरट्यांनी राजेंद्र कोरडे यांच्यावर हल्ला केला आणि घरातील सदस्यांच्या मानेवर कोयते लावून मारून टाकण्याची धमकी देत, घरातील15 तोळे सोन्याचे आणि 10 तोळे चांदीचे दागिने लंपास केले. दरम्यान, याप्रकरणी आळेफाटा पोलिसांनी अधिक तपास सुरु केला आहे.
