Baramati By Election : पुणे : बारामती (Baramati) विधानसभा मतदारसंघात लवकरच पोटनिवडणूक होणार असून त्यासाठी निवडणूक आयोगाने तयारी सुरू केली आहे. राज्याचे दिवंगत नेते आणि माजी उपमुख्यमंत्री अजित पवार (Ajit Pawar) यांच्या अपघाती निधनामुळे ही जागा रिक्त झाली आहे. या पार्श्वभूमीवर आयोगाने विशेष संक्षिप्त मतदारयादी पुनर्परीक्षण कार्यक्रम जाहीर केला आहे. 1 जानेवारी 2026 पर्यंत नाव नोंदवलेले मतदार या पोटनिवडणुकीत मतदान करू शकतील. 10 मार्च रोजी अंतिम प्रारूप मतदारयादी जाहीर केली जाणार असल्याची माहिती देण्यात आली आहे.
दरम्यान, या पोटनिवडणुकीसाठी राष्ट्रवादी काँग्रेसकडून सुनेत्रा पवार यांना उमेदवारी देण्याचा निर्णय घेण्यात आल्याची माहिती समोर आली आहे. मुंबईत 23 फेब्रुवारी रोजी रात्री झालेल्या पक्षाच्या कोअर कमिटीच्या बैठकीत याबाबत एकमत झाले. ही बैठक प्रफुल पटेल यांच्या निवासस्थानी पार पडली. बैठकीला प्रदेशाध्यक्ष सुनील तटकरे आणि इतर सदस्य उपस्थित होते. पक्षाकडून ही निवडणूक बिनविरोध व्हावी, यासाठी प्रयत्न होणार असल्याचे सांगितले जात आहे.
याच बैठकीत आगामी राज्यसभा निवडणुकीसाठी पार्थ पवार यांचे नाव निश्चित करण्यात आल्याचीही माहिती मिळाली आहे. पक्षाच्या वरिष्ठ नेत्यांच्या उपस्थितीत या निर्णयावर शिक्कामोर्तब करण्यात आले.
अजित पवार यांच्या विमान अपघातात झालेल्या निधनानंतर त्यांच्या पत्नी सुनेत्रा पवार यांनी राज्याच्या उपमुख्यमंत्रीपदाची शपथ घेतली. राजभवन येथे झालेल्या कार्यक्रमात राज्यपालांनी त्यांना पद आणि गोपनीयतेची शपथ दिली. त्या महाराष्ट्राच्या इतिहासातील पहिल्या महिला उपमुख्यमंत्री ठरल्या आहेत. सध्या सुरू असलेले राज्याचे अर्थसंकल्पीय अधिवेशन हे त्यांचे पहिले अधिवेशन आहे. त्यामुळे बारामती पोटनिवडणूक आणि राज्यातील राजकीय घडामोडींकडे सर्वांचे लक्ष लागले आहे.
