पुणे : ओबसीमधूनच आरक्षण पाहिजे यासाठी काही नेते ताकद लावत असल्याची टीका मंत्री छगन भुजबळ यांनी केली आहे. याप्रकरणात आपण अॅडव्होकेट जनरल यांच्याशी बोललो आहे. राज्य सरकार आणि मागासवर्ग आयोगातर्फे शपथपत्र दाखल झाल्याची माहिती त्यांनी यावेळी दिली. तसेच दोन महिन्यात जातगणना पूर्ण करण्याची मागणी देखील भुजबळ यांनी केली आहे. ते पुण्यात पत्रकारांशी बोलत होते.
पुढे बोलताना म्हणाले, सहा जानेवारीला पंढरपूर ओबीसी एल्गार मेळावा आहे. सात जानेवारीला राष्ट्रवादीचा कार्यक्रम आहे. तिथे माझी उपस्थिती आवश्यक आहे. सावित्रीबाई फुले यांना अभिवादन करण्यासाठी जाणार आहे. भिडे वाड्याची तपासणी सुरू असून काम लवकर व्हावं ही आमची इच्छा आहे.
लोकशाहीमध्ये सभा घेण्याचा त्यांना अधिकार असल्याचे मनोज जरांगे म्हणाले आहेत. या टीकेला उत्तर देताना छगन भुजबळ म्हणाले, मला वेड लागलंच आहे. ओबीसी समाजासाठी काम करण्याचं वेड मला लागलं आहे. तुम्ही घरोघरी सर्वेक्षण करा दोन दिवसात करा किंवा 15 दिवसात करा. तुम्ही 50 टक्के लोकांचे सर्वेक्षण १५ दिवसात करणार मग सगळ्यांचं करा, एक महिना अजून लागेल.
