Weather Update : आज नवीन वर्षाच्या पहिल्या दिवशी तापमानात आणखी घात होण्याचा अंदाज हवामान विभागाने वर्तवला आहे. पूर्वेकडून येणाऱ्या थंड हवेमुळे गारठा वाढला असून उत्तर भारतात सर्वत्र धुक्याची चादर पसरली आहे. उत्तरेकडील भागात थंडीत चांगलीच वाढ झाली असून जानेवारी महिन्याच्या पहिल्या आठवड्यात थंडी कायम राहणार असल्याचा अंदाजही IMD ने वर्तवला आहे.
देशासह राज्यातील हवामानात सतत बदल होत असून कुठं ढगाळ वातावरण तर कुठं थंडीचा कडाका चांगलाच जाणवत आहे. दिल्लीत रविवारी सकाळी 5 अंश सेल्सियस तापमान पाहायला मिळालं. पहाटेपासून सूर्यकिरणे पाहायला मिळाली नसून वाढलेल्या थंडीमुळे नागरिकांना हुडहुडी भरली आहे.
‘या’ भागात पावसाची शक्यता
देशाच्या उत्तरेकडील भागात थंडीची लाट कायम असून थंडीचा कडाका चांगलाच वाढणार आहे. देशाच्या दक्षिणेकडे मात्र पावसाची शक्यता वर्तवण्यात आली आहे. हवामान विभागाने दिलेल्या माहितीनुसार, उत्तर प्रदेश, मध्य प्रदेश, छत्तीसगड, तामिळनाडू आणि केरळमध्ये आज आणि उद्या पाऊस पडण्याची शक्यता आहे. अनेक राज्यांमध्ये दाट धुक्याचा इशारा देण्यात आला आहे. सध्या देशातील बहुतेक भागात कडाक्याची थंडी सुरू आहे.
विदर्भ, मध्य महाराष्ट्रात पुढील २ दिवस पावसाची शक्यता
महाराष्ट्रात मराठवाडा वगळता कोकण आणि मध्य महाराष्ट्र आणि विदर्भात ढगाळ वातावरण असल्याचा अंदाज हवामान विभागाने वर्तवला आहे. विदर्भ आणि मध्य महाराष्ट्रात पुढील दोन दिवस पावसाची शक्यता आहे. मध्य महाराष्ट्रातील 17 तसेच विदर्भातील अमरावती, नागपूर, भंडारा, गोंदिया आणि गडचिरोली जिल्ह्यात अशा एकूण 22 जिल्ह्यात 1 ते 7 जानेवारी दरम्यानच्या आठवड्यात काही ठिकाणीच किंचित ढगाळ वातावरण राहू शकते. तसेच या जिल्ह्यांच्या तुरळक ठिकाणी अगदी किरकोळ पाऊस असल्याची शक्यता हवामान विभागाने वर्तवली आहे.
