वडगावशेरी : बहुजन समाज पार्टीच्या राष्ट्रीय अध्यक्षा मायावती यांची महाराष्ट्रातील बसपा उमेदवाराच्या प्रचारार्थ फुले, शाहू, आंबेडकरांची जन्मभूमी-कर्मभूमी असलेल्या पुण्यात जाहीर सभा १७ नोव्हेंबर रोजी प्रादेशिक मनोरुग्णालय, मेंटल हॉस्पिटल मैदान, ई कॉमर्सझोन, आयटी पार्कसमोर, येरवडा या ठिकाणी दुपारी १२ वाजता होणार आहे.
बहुजन समाज पार्टी महाराष्ट्रमध्ये २३७ ठिकाणी स्वबळावर ताकदीनिशी विधानसभा निवडणूक लढवीत आहेत. या वेळी महाराष्ट्राच्या विधानसभेत बसपाचे खाते उघडेल व बसपा बॅलन्सिंग पॉवर म्हणून महाराष्ट्रात उभारेल असा आमचा विश्वास आहे. अपप्रचारास सडेतोड उत्तर या निवडणुकीने मिळेल असा प्रयत्न बसपाचा राहणार आहे.
या सभेस बहुजन समाज पार्टीच्या अध्यक्षांसोबत बसपाचे राष्ट्रीय कोऑर्डिनेटर आकाश आनंद, बसपाचे राज्यसभेचे खासदार केंद्रीय कोऑर्डिनेटर रामजी गौतम, केंद्रीय कोऑर्डिनेटर महाराष्ट्र प्रभारी नर्मदाप्रसाद अहिरवार, महाराष्ट्र प्रदेशाध्यक्ष सुनील डोंगरे उपस्थित राहणार असल्याची माहिती पुणे जिल्हाध्यक्ष दिलीप कुसाळे यांनी दिली आहे.
