पुणे : निवडणुकीच्या पार्श्वभूमीवर पोलिसांनी पुणे, सांगली, सातारा, कोल्हापूर, तसेच सोलापूर या पाच जिल्ह्यांतील तब्बल ३४ हजार २८७ सराईत गुंडांविरुद्ध प्रतिबंधात्मक कारवाई केली. या मोहिमेत २३ पिस्तुले आणि ३६ काडतुसे जप्त करण्यात आली आहेत. या कारवाईत १९ कोटी १३ लाख रुपये किमतीची रोकड, गावठी दारू, अमली पदार्थ, सोने-चांदी हस्तगत करण्यात आले.
पोलिसांच्या कोल्हापूर परिक्षेत्रात पुणे, सांगली, सातारा, कोल्हापूर, सोलापूर या पाच जिल्ह्यांचा समावेश होतो. पोलिसांनी त्यानुसार पाच जिल्ह्यांतील ३४ हजार २८७ सराईतांविरुद्ध प्रतिबंधात्मक कारवाई केली. आचारसंहितेचे उल्लंघन केल्याप्रकरणी दहा दखलपात्र, १५ अदखलपात्र गुन्हे दाखल करण्यात आले आहेत. निवडणूक शांततेत पार पाडण्यासाठी पोलिसांनी पाच जिल्ह्यांतील सराईतांवर करडी नजर ठेवली आहे.
कोल्हापूर, सांगली आणि सोलापूर या तीन जिल्ह्यांच्या सीमा कर्नाटक राज्याला लागून आहेत. निवडणूक काळात शेजारी कर्नाटकातून मद्य, अमली पदार्थ, तसेच बेकायदा वस्तू पाठविल्या जाण्याची शक्यता आहे. या पार्श्वभूमीवर कागल, शिवनाकवाडी, सांगली, म्हैसाळ, कात्राळ येथे तपासणी नाके सुरू करण्यात आले आहेत. तेथे प्रादेशिक परिवहन विभागातील कर्मचारी, वस्तू आणि सेवा कर कार्यालय (जीएसटी), राज्य उत्पादन शुल्क, तसेच वन विभागातील अधिकाऱ्यांची पथके तैनात आहेत.
अमली पदार्थांची तस्करी रोखण्यासाठी अमली पदार्थ शोधणारे श्वान तैनात करण्यात आले आहेत. निवडणुकीच्या पार्श्वभूमीवर सोशल मीडियावरील मजकुरावर पोलिसांकडून लक्ष ठेवण्यात येत आहे. सायबर पोलिसांच्या पथकाला याबाबतचे काम सोपविण्यात आले आहे. समाजमाध्यमात बदनामीकारक, तसेच तेढ निर्माण करणारे संदेश प्रसारित केल्यास कारवाईचा इशारा देण्यात आला आहे.
