मुंबई: अमेरिका आणि इराण यांच्यात सुरू असलेल्या तणावाच्या पार्श्वभूमीवर आंतरराष्ट्रीय स्तरावर महत्त्वाच्या घडामोडी घडत आहेत. चर्चेची पहिली फेरी निष्फळ ठरल्यानंतर अमेरिकेचे माजी राष्ट्राध्यक्ष डोनाल्ड ट्रम्प यांनी पंतप्रधान नरेंद्र मोदी यांच्याशी फोनवरून सुमारे 40 मिनिटे चर्चा केल्याची माहिती समोर आली आहे. या चर्चेत इराणमधील युद्धस्थिती आणि भारत-अमेरिका संबंध यावर सविस्तर चर्चा झाल्याचे सांगितले जात आहे.
अमेरिका आणि इराण यांच्यातील युद्ध थांबवण्यासाठी पाकिस्तानमध्ये चर्चेची पहिली फेरी पार पडली होती. मात्र या चर्चेत कोणताही ठोस निर्णय न झाल्याने ती निष्फळ ठरली. त्यानंतर ट्रम्प आणि मोदी यांच्यातील ही चर्चा महत्त्वाची मानली जात आहे. गेल्या 1 महिन्यात या दोन्ही नेत्यांमध्ये झालेली ही दुसरी फोनवरची चर्चा आहे.
दरम्यान, आता दुसऱ्या फेरीच्या चर्चेसाठी हालचाली सुरू झाल्या आहेत. 16 एप्रिल रोजी ही बैठक होण्याची शक्यता असून ती इस्लामाबाद किंवा जिनेव्हा येथे होऊ शकते. पाकिस्तान, तुर्की आणि इजिप्त हे देश मध्यस्थी करत असून संयुक्त राष्ट्रांनीही चर्चा पुन्हा सुरू करण्यासाठी पुढाकार घेतला आहे.
ट्रम्प यांनी दावा केला आहे की, इराणने स्वतः फोन करून चर्चेसाठी पुन्हा तयारी दर्शवली आहे. मात्र सर्व अटी मान्य झाल्याशिवाय कोणताही करार होणार नाही, असेही त्यांनी स्पष्ट केले. तसेच इराणकडे कधीही आण्विक शस्त्र नसतील, असेही त्यांनी ठामपणे सांगितले.
या पार्श्वभूमीवर इराणचे परराष्ट्रमंत्री अब्बास अराघची आणि रशियाचे परराष्ट्रमंत्री सर्गेई लाव्हारोव्ह यांच्यातही चर्चा झाली आहे. युद्ध थांबवण्यासाठी रशियाने पुढाकार घेण्याचे संकेत दिले आहेत.
दरम्यान, इराणने शांती प्रक्रियेसाठी सौदी अरेबिया, यूएई, कतार, बहारिन आणि जॉर्डन या देशांकडून नुकसान भरपाईची मागणी केली आहे. अमेरिकेला साथ देणाऱ्या देशांनी ही भरपाई द्यावी, अशी भूमिका इराणने मांडली आहे. त्यामुळे पुढील काही दिवसांत या प्रकरणात महत्त्वाच्या घडामोडी घडण्याची शक्यता आहे.
