पुणे : लोहगड किल्ल्यावरून दरीत ढकलून करण्यात आलेल्या केतन अग्रवाल या तरुण बांधकाम व्यावसायिकाच्या हत्या प्रकरणाला आता एक नवीन वळण मिळाले आहे. या खळबळजनक प्रकरणात वडगाव मावळ सत्र न्यायालयात नुकतीच सुनावणी पार पडली. न्यायालयाने आरोपी सिया गोयल आणि तिचा प्रियकर चेतन चौधरी या दोघांचीही 14 दिवसांच्या न्यायालयीन कोठडीत रवानगी केली आहे. या सुनावणीदरम्यान सर्वांचे लक्ष लागून राहिलेल्या नार्को टेस्टबाबत न्यायालयात महत्त्वाची चर्चा झाली.
न्यायालयाने असे स्पष्ट केले आहे कि, जोपर्यंत आरोपी स्वतःहून नार्को चाचणीसाठी आपली संमती देत नाहीत, तोपर्यंत अशी टेस्ट करता येणार नाही.दरम्यान, सरकारी वकिलांनीही सध्याच्या घडीला नार्को टेस्टची कोणतीही आवश्यकता नसल्याचे न्यायालयात सांगितले. आरोपींच्या वतीने वकील विपुल दुशिंग यांनी बाजू मांडली की, सियाने पोलिसांना तपासात पूर्ण सहकार्य केले आहे आणि मोबाईलमधील डेटा तपासण्यासाठी आरोपींना पोलीस कोठडीत ठेवण्याची गरज नाही.
सरकारी पक्षाने न्यायालयात सांगितले की, सियाचा दुसरा मोबाईल जप्त करण्यात आला असून त्यातील डिलीट केलेला डेटा पोलिसांनी परत मिळवला आहे. या फोनमधील चॅटिंगमध्ये सिया आणि चेतन यांनी सांकेतिक भाषेचा वापर केला असून, ते संभाषण उलगडण्यासाठी दोघांची समोरासमोर चौकशी करणे गरजेचे आहे.
या संपूर्ण मोबाईल डेटा आणि चॅटिंगची कायदेशीर सत्यता तपासण्यासाठी फॉरेन्सिक लॅबचा (न्यायवैद्यक शास्त्र) अहवाल अत्यंत महत्त्वाचा ठरणार असून, हा अहवाल आल्यानंतरच पुढील चित्र स्पष्ट होईल अशी माहिती पोलिसांनी दिली आहे. या घटनेचा पुढील तपास पोलीस करत आहेत.यातून आणखीन काय माहिती पुढे येते हे पाहणे महत्वाचे ठरणार आहे.
