विशाल शिंदे
पुणे : पुणे–सातारा राष्ट्रीय महामार्गावरील नसरापूर हद्दीतील डोंगरमाथा हॉटेल परिसरातील सर्व्हिस रोडवर मद्यधुंद अवस्थेत कार चालविणाऱ्या चालकावर राजगड पोलिसांनी कारवाई केली आहे .
पोलिसांनी दिलेल्या माहितीनुसार, 19 जुलै रोजी सकाळी सुमारे 9.45 वाजण्याच्या सुमारास डायल 112 वर एका कार चालकाकडून मद्यधुंद अवस्थेत वाहन चालविले जात असल्याची माहिती प्राप्त झाली होती. त्यानुसार राजगड पोलिसांनी तात्काळ घटनास्थळी धाव घेत संबंधित कार अडवून चालकाची चौकशी केली.
यावेळी पोलिसांनी चालकाची ब्रेथ अॅनालायझर मशीनद्वारे तपासणी केली असता, त्याच्या शरीरातील अल्कोहोलचे प्रमाण कायदेशीर मर्यादेपेक्षा अधिक असल्याचे आढळून आले. त्यानंतर संबंधित चालकाविरुद्ध मोटार वाहन कायद्यानुसार कारवाई करण्यात आली.
मद्यप्राशन करून वाहन चालविणे हे स्वतःच्या तसेच इतर वाहनचालकांच्या जीवितासाठी धोकादायक असल्याने नागरिकांनी अशा प्रकारचे कृत्य टाळावे, तसेच वाहतूक नियमांचे पालन करून सुरक्षित प्रवास करावा, असे आवाहन राजगड पोलिसांकडून करण्यात आले आहे.
या प्रकरणाचा पुढील तपास राजगड पोलीस करत आहेत
