विशाल शिंदे
पुणे : भोर तालुक्यातील रांजे येथील एका खासगी कंपनीची तब्बल 20 लाख रुपयांची ऑनलाइन फसवणूक झाल्याची धक्कादायक घटना समोर आली आहे. व्हॉट्सअॅपवरील डिस्प्ले फोटो (डीपी) म्हणून कंपनीच्या संचालकाचा फोटो वापरून एका अनोळखी व्यक्तीने कंपनीच्या कर्मचाऱ्यांची दिशाभूल करत ही फसवणूक केल्याप्रकरणी राजगड पोलिसांत गुन्हा दाखल करण्यात आला आहे.
पोलिसांनी दिलेल्या माहितीनुसार, 17 जुलै रोजी सकाळी 10 ते 11 वाजण्याच्या दरम्यान ही घटना घडली. संबंधित अनोळखी व्यक्तीने एका व्हॉट्सअॅप क्रमांकावरून कंपनीच्या कर्मचाऱ्यांशी संपर्क साधला. व्हॉट्सअॅप डीपीवर कंपनीच्या संचालकाचा फोटो असल्याने कर्मचाऱ्यांचा विश्वास बसला.
यानंतर “कंपनीला नवीन पुरवठादार (सप्लायर) मिळाला असून त्याला तातडीने अॅडव्हान्स पेमेंट करायचे आहे,” असे सांगत संबंधित व्यक्तीने कंपनीच्या कर्मचाऱ्यांकडून 20 लाख रुपये हस्तांतरित करून घेतले. व्यवहार झाल्यानंतर फसवणूक झाल्याचे लक्षात आले.
या प्रकरणी कंपनीच्या प्रतिनिधीने तक्रार दाखल केली असून, सायबर झिरो एफआयआरद्वारे हे प्रकरण राजगड पोलीस ठाण्याकडे वर्ग करण्यात आले. त्यानंतर राजगड पोलिसांनी अनोळखी आरोपीविरुद्ध आर्थिक फसवणुकीचा गुन्हा दाखल करून तपास सुरू केला आहे.
सायबर गुन्हेगारांकडून व्हॉट्सअॅप डीपीवर ओळखीच्या व्यक्तीचा फोटो वापरून कर्मचारी किंवा व्यावसायिकांची फसवणूक करण्याचे प्रकार वाढत आहेत. त्यामुळे कोणत्याही आर्थिक व्यवहारापूर्वी संबंधित व्यक्तीशी प्रत्यक्ष फोनवर किंवा इतर खात्रीशीर माध्यमातून संपर्क साधून पडताळणी करावी, असे आवाहन पोलिसांकडून करण्यात आले आहे.या प्रकरणाचा पुढील तपास राजगड पोलीस करत आहेत.
