पुणे : शहरात वाढत्या गुन्हेगारीच्या पार्श्वभूमीवर कायदा आणि सुव्यवस्था अबाधित राखण्यासाठी पुणे पोलिसांनी कठोर पावले उचलली आहेत. सणासुदीच्या काळात कोणताही अनुचित प्रकार घडू नये, यासाठी पोलिसांनी एका गुन्हेगारी टोळीच्या प्रमुखासह दहा सराईत गुन्हेगारांना दोन वर्षांसाठी तडीपार केले आहे. या कारवाईमुळे गुन्हेगारी प्रवृत्तीच्या व्यक्तींना आळा घालण्याचा प्रयत्न करण्यात येत आहे. कात्रज, आंबेगाव, बिबवेवाडी आणि धनकवडी परिसरातील या आरोपींना पुणे शहर, पिंपरी-चिंचवड आणि पुणे जिल्ह्यातून हद्दपार करण्यात आले आहे.
तडीपार करण्यात आलेल्या आरोपींवर खून, खुनाचा प्रयत्न, दरोडा, दरोड्याची तयारी, खंडणी उकळणे, बेकायदेशीर शस्त्रे बाळगणे, गंभीर दुखापत करणे, अमली पदार्थांची विक्री, सरकारी कामात अडथळा निर्माण करणे आणि परिसरात दहशत माजवणे यांसारखे गंभीर गुन्हे दाखल आहेत. आंबेगाव पोलीस ठाण्याच्या हद्दीतील आकाश ऊर्फ बटन प्रकाश बांडीलकर (वय २०), रामेश्वर लक्ष्मण करे (वय २५), गणेश तमाराम जाधव (वय २३) आणि आदित्य ऊर्फ सोन्या खंडू कांबळे (वय २३) यांचा या कारवाईत समावेश आहे.
बिबवेवाडी पोलीस ठाण्याच्या हद्दीतील अनिकेत विजय कोंढरे (वय २२) आणि किरण दत्तात्रेय पांगारे (वय २३) यांनाही तडीपार करण्यात आले आहे. तसेच भारती विद्यापीठ पोलीस ठाण्याच्या हद्दीतील विकास अनिल जाधव (वय २८), विवेक रमेश शेवाळे (वय २४), गणेश ऊर्फ चिराग सचिन बडगुजर (वय २२) आणि ओंकार अनंत बहिरट (वय २३) यांच्यावरही कारवाई करण्यात आली आहे. हे सर्व आरोपी कात्रज, आंबेगाव, धनकवडी आणि परिसरातील विविध भागांत राहणारे आहेत. शहरातील गुन्हेगारीला आळा घालण्यासाठी सराईत गुन्हेगारांविरुद्ध यापुढेही कठोर प्रतिबंधात्मक कारवाई सुरूच राहील, असा इशारा पुणे पोलिसांनी दिला आहे.
