पुणे: महाराष्ट्रातील धडाडीचे निर्णय आणि शिस्तप्रिय प्रशासनासाठी ओळखले जाणारे वरिष्ठ सनदी अधिकारी तुकाराम मुंढे यांचा सोशल मीडियावरील प्रभावही आता चर्चेत आला आहे. उपलब्ध आकडेवारीनुसार, इंस्टाग्रामवरील फॉलोअर्सच्या संख्येसोबतच एंगेजमेंट रेटमध्येही मुंढे हे अनेक दिग्गज राजकीय नेते आणि वरिष्ठ अधिकाऱ्यांपेक्षा आघाडीवर असल्याचे दिसून येते.
इंस्टाग्रामवर तुकाराम मुंढे यांचे सुमारे ३४.१५ लाख फॉलोअर्स आहेत. त्यांच्यापेक्षा मुख्यमंत्री देवेंद्र फडणवीस यांचे २९.०२ लाख, तर उपमुख्यमंत्री एकनाथ शिंदे यांचे १३.०१ लाख फॉलोअर्स आहेत. विशेष म्हणजे, फॉलोअर्सची संख्या जास्त असण्याबरोबरच मुंढेंच्या पोस्टला मिळणारा प्रतिसादही लक्षणीय आहे.
गेल्या ६० दिवसांतील सोशल मीडिया कामगिरीचा विचार केल्यास मुंढे यांनी या काळात केवळ १३ पोस्ट केल्या आहेत. याउलट देवेंद्र फडणवीस यांनी ९७, तर एकनाथ शिंदे यांनी २५ पोस्ट केल्या. मात्र, कमी पोस्ट करूनही मुंढे यांचा एंगेजमेंट रेट दोन्ही नेत्यांच्या तुलनेत मोठ्या प्रमाणात अधिक असल्याचे आकडेवारीतून समोर येते.
मुंढे यांचा इंस्टाग्राम एंगेजमेंट रेट तब्बल २०.३५ टक्के असल्याचे नमूद करण्यात आले आहे. देवेंद्र फडणवीस यांचा एंगेजमेंट रेट ०.५० टक्के, तर एकनाथ शिंदे यांचा ०.२४ टक्के आहे. त्यामुळे फॉलोअर्सच्या तुलनेत त्यांच्या पोस्टवर मिळणारा प्रतिसाद मुंढेंच्या बाबतीत अधिक प्रभावी असल्याचे दिसते.
एक्स या सोशल मीडिया प्लॅटफॉर्मवर मात्र फॉलोअर्सच्या बाबतीत राजकीय नेते पुढे आहेत. देवेंद्र फडणवीस यांचे सुमारे ५.०२ लाख, एकनाथ शिंदे यांचे ३.८७ लाख, तर तुकाराम मुंढे यांचे २.६५ लाख फॉलोअर्स आहेत. मात्र, एंगेजमेंट रेटमध्ये पुन्हा एकदा मुंढेंनी आघाडी घेतली आहे. त्यांचा एंगेजमेंट रेट ४.६२ टक्के असून, फडणवीस यांचा ०.०७ टक्के आणि शिंदे यांचा ०.०४ टक्के आहे.
इतर लोकप्रिय सनदी आणि पोलीस अधिकाऱ्यांशी तुलना केली तरी मुंढेंची सोशल मीडिया कामगिरी लक्षवेधी ठरते. इंस्टाग्रामवर विश्वास नांगरे पाटील यांचे ६.१२ लाख, तर समीर वानखेडे यांचे ८.४७ लाख फॉलोअर्स आहेत. मात्र, एंगेजमेंट रेटमध्ये मुंढे २०.३५ टक्क्यांसह आघाडीवर आहेत. विश्वास नांगरे पाटील यांचा एंगेजमेंट रेट ३.६० टक्के, तर समीर वानखेडे यांचा ३.२० टक्के असल्याचे आकडेवारीत नमूद आहे.
तुकाराम मुंढे यांचे अधिकृत व्हेरिफाइड फेसबुक पेज उपलब्ध नसल्याने या तुलनेत फेसबुकचा समावेश करण्यात आलेला नाही. त्यामुळे उपलब्ध इंस्टाग्राम आणि एक्सवरील आकडेवारीनुसार, कमी पोस्ट करूनही तुकाराम मुंढे यांचा सोशल मीडियावरील प्रभाव आणि त्यांच्या पोस्टला मिळणारा प्रतिसाद विशेष ठरत असल्याचे चित्र आहे.
