पुणे : लोहगड किल्ल्यावरून झालेल्या केतन अग्रवाल हत्या प्रकरणाने संपूर्ण देश हादरला आहे. केतनच्या मृत्यूच्या धक्क्यातून कुटुंब सावरत नाही तोच, अग्रवाल परिवारावर आणखी एक दुःखाचा डोंगर कोसळला आहे. नातवाच्या हत्येचा तीव्र धक्का सहन न झाल्याने केतनचे आजोबा देवीचंद अग्रवाल यांचे रुग्णालयात उपचार सुरू असताना काल निधन झाले असल्याची माहिती समोर आली आहे.
देवीचंद अग्रवाल हे काही काळापासून आजारी होते आणि त्यांच्यावर पुण्यातील एका खाजगी रुग्णालयात उपचार सुरू होते. काही दिवसांपूर्वीच त्यांची हृदयशस्त्रक्रिया झाली होती. मात्र, लाडक्या नातवाच्या अचानक जाण्याने त्यांची प्रकृती अधिकच बिघडली. दोन दिवसांपूर्वी त्यांना व्हेंटिलेटरवर ठेवण्यात आले होते, परंतु उपचारादरम्यान त्यांची प्राणज्योत मालवली. केतनचे वडील विशाल अग्रवाल यांनी सोशल मीडियावर ‘मिस यु डॅड’ अशी भावनिक पोस्ट शेअर करत या वृत्ताला दुजोरा दिला आहे.
दुसरीकडे, केतन अग्रवालच्या हत्येचा तपास पोलीस अत्यंत वेगाने करत आहेत. केतनला लग्नासाठी नकार द्यायचा असल्याने, त्याची होणारी बायको सिया आणि तिचा प्रियकर चेतन यांनी मिळून त्याचा काटा काढल्याचे तपासात निष्पन्न झाले आहे. दोघांनी केतनला लोहगड किल्ल्यावरून खाली ढकलून दिले होते. या गुन्ह्या प्रकरणी पोलिसांनी दोघांनाही अटक केली आहे.
पोलिसांनी दिलेल्या माहितीनुसार, सिया आणि चेतन हे दोघेही एकमेकांशी ‘कोड वर्ड’मध्ये संवाद साधत होते. गुन्ह्याचे रहस्य उलगडण्यासाठी पोलिसांनी यापूर्वीच त्यांचे दोन मोबाईल जप्त केले होते. मात्र, गुरुवारी पोलिसांनी सियाचा आणखी एक छुपा मोबाईल हस्तगत केला आहे. या दुसऱ्या मोबाईलमध्ये अनेक महत्त्वाचे पुरावे असण्याची शक्यता वर्तवली जात आहे.
दोघांमधील संशयास्पद संभाषण आणि हत्येचा नेमका कट शोधण्यासाठी हे तिन्ही फोन फॉरेन्सिक लॅबमध्ये पाठवण्यात आले आहेत. फॉरेन्सिक रिपोर्ट आल्यानंतर या संपूर्ण प्रकरणाचा आणि त्यांच्यातील गुप्त संभाषणाचा खरा खुलासा समोर येईल, असा विश्वास पोलिसांना आहे.
