आळंदी : रायगड जिल्ह्यातील दिवेआगर समुद्रकिनारी आठ विद्यार्थ्यांचा बुडून मृत्यू झालेल्या दुर्दैवी घटनेप्रकरणी अखेर आळंदीतील ‘विनर्स अकॅडमी’च्या पाच जणांविरोधात निष्काळजीपणाचा गुन्हा दाखल करण्यात आला आहे. सहलीचे नियोजन, ठरलेल्या ठिकाणाऐवजी दुसऱ्या समुद्रकिनारी विद्यार्थ्यांना नेणे आणि सुरक्षेची साधने न पुरवणे, यांसारखे गंभीर आरोप तक्रारीत करण्यात आले आहेत.
अकॅडमीचे संस्थापक शिक्षक अमर गोटीराम आदक (वय 29), मृणाल सुरेश नारखेडे (वय 30), सबा महबूब इनामदार (वय 27), शिल्पा अमर आदक (वय 27) आणि वैष्णवी मृणाल नारखेडे (वय 28, सर्व रा. आळंदी देवाची, ता. खेड) अशी गुन्हा दाखल झालेल्यांची नावे आहेत. याबाबत केळगाव येथील युवराज बबनराव वहिले (वय 42) यांनी दिघी सागरी पोलीस ठाण्यात तक्रार दिली आहे.
पोलिसांनी दिलेल्या माहितीनुसार, अकॅडमीतील अकरावीच्या विद्यार्थ्यांना रायगड किल्ला व श्रीवर्धन बीच येथे सहलीसाठी नेण्याचे सांगण्यात आले होते. मात्र, रायगड किल्ल्यावरील रोप-वे बंद असतानाही त्याचे शुल्क घेऊन विद्यार्थ्यांना पायरीमार्गे गडावर नेण्यात आले. त्यानंतर नियोजित श्रीवर्धन बीचऐवजी विद्यार्थ्यांना दिवेआगर समुद्रकिनाऱ्यावरील निर्जन ठिकाणी नेण्यात आले.
विद्यार्थ्यांना पोहता येत नसल्याची माहिती असूनही त्यांना समुद्रात खेळण्यासाठी पाठवण्यात आले आणि आवश्यक सुरक्षा साधने पुरवण्यात आली नाहीत, असा आरोप तक्रारीत आहे. समुद्राच्या पाण्याचा अंदाज न आल्याने तक्रारदारांच्या मुलासह आठ विद्यार्थ्यांचा बुडून मृत्यू झाला. या घटनेच्या चौकशीनंतर गुन्हा दाखल करण्यात आला असून, दिघी सागरी पोलीस ठाण्याचे सहाय्यक पोलीस निरीक्षक संतोष आवटी पुढील तपास करीत आहेत.
