पुणे : कॉकरोच जनता पार्टीच्या अडचणी काही केल्या कमी होण्याचे नाव घेत नाहीयेत. मुख्य निवडणूक आयुक्त ज्ञानेश कुमार यांच्या राजीनाम्याच्या मागणीसाठी CJP ने 10 ऑक्टोबरपासून दिल्लीत आंदोलन पुकारले होते. मात्र, या आंदोलनापूर्वीच पक्षाचे बडे नेते कायदेशीर कचाट्यात सापडले. अभिजीत दिपके, सौरभ दास, आशुतोष रांका आणि अजिंक्य शिंदे यांच्यावर कारवाई करण्यात आली.
10 ऑक्टोबर रोजी पोलिसांनी सौरभ दास, आशुतोष रांका आणि अभिजीत दिपके यांना अटक केली होती. त्यानंतर त्यांना प्रत्येकी 50 हजार रुपयांच्या बॉन्डवर सोडण्यात आले. पुढील एक वर्ष शांतता राखण्याची अट या नेत्यांवर घालण्यात आली होती. परंतु, या अटीनंतरही सौरभ दास आणि आशुतोष रांका यांनी पुन्हा जंतरमंतरवर जाण्याचा प्रयत्न केला. त्यामुळे त्यांना पुन्हा जेलमध्ये पाठवण्यात आले. तिथून सुटका करताना त्यांच्यावर पुन्हा कडक अटी व शर्यती लादण्यात आल्या. आता जर त्यांनी हे नियम तोडले, तर त्यांच्यासमोरील अडचणी आणखी वाढू शकतात.
दुसरीकडे, केंद्रीय शिक्षण मंत्री धर्मेंद्र प्रधान यांचे आंदोलन यशस्वी ठरले, पण CJP ला ज्ञानेश कुमार यांच्याविरोधातील आंदोलन अपेक्षेप्रमाणे उभे करता आले नाही. नीट पेपरफुटीच्या मुद्द्यावर CJP ने मोठा लढा उभारला होता, मात्र ज्ञानेश कुमार यांच्या राजीनाम्याच्या प्रकरणात त्यांना तोच प्रभाव पाडण्यात अपयश आले.
सध्या दिल्ली क्राईम ब्रँचकडून CJP च्या नेत्यांवरील दोन एफआयआरची कसून चौकशी सुरू आहे. या कायदेशीर कारवाईमुळे आणि एकापेक्षा जास्त बॉन्डवर सह्या केल्यामुळे पक्षापुढील संकट अधिक गडद झाले आहे. त्यातच, अभिजीत दिपके यांनी आपल्या कार्यकर्त्यांना दिवाळी कुटुंबासोबत साजरी करण्याचे आवाहन केले आहे. त्यामुळे कोणत्याही मोठ्या आंदोलनाशिवाय कार्यकर्त्यांना एकत्र कसे ठेवायचे आणि संघटन कसे टिकवायचे, हे मोठे आव्हान आता कॉकरोच जनता पार्टीसमोर उभे ठाकले आहे
