बीड: बीड जिल्ह्यातील केजचे तहसीलदार राकेश गिड्डे यांच्या (Rakesh Gidde Death) आकस्मिक निधनानंतर संपूर्ण परिसरात हळहळ व्यक्त होत असतानाच त्यांच्या मृत्यूबाबत संशय निर्माण झाला आहे. सुरुवातीला हा अपघाती मृत्यू असल्याचे मानले जात होते, मात्र आता तो अपघात की घातपात याबाबत चर्चा सुरू झाली आहे. (Beed News)
संभाजी ब्रिगेड आणि केज संघर्ष समितीने या प्रकरणाची सखोल चौकशी करण्याची मागणी केली आहे. यासंदर्भात तहसीलदार दुलाजी मेंडके आणि जिल्हाधिकारी विवेक जॉन्सन यांना निवेदन देण्यात आले आहे. या निवेदनात गिड्डे यांच्या मृत्यूभोवती निर्माण झालेल्या संशयास्पद बाबींचा उल्लेख करण्यात आला आहे.
प्रामुख्याने, अपघातानंतर घटनास्थळावरून गिड्डे यांचा मोबाईल आणि महत्त्वाचा डेटा असलेला लॅपटॉप गायब झाल्याची बाब समोर आली आहे. या घटनेमुळे हा अपघात नसून काहीतरी घातपात असू शकतो, असा संशय व्यक्त करण्यात येत आहे. या प्रकरणात कोणताही संभ्रम राहू नये, यासाठी उच्चस्तरीय चौकशी समिती नेमून सत्य लवकरात लवकर समोर आणावे, अशी मागणी करण्यात आली आहे.
राकेश गिड्डे हे कर्तव्यदक्ष आणि प्रामाणिक अधिकारी म्हणून ओळखले जात होते. जनतेमध्ये त्यांच्याबद्दल विश्वास होता. त्यामुळे त्यांच्या मृत्यूबाबत निर्माण झालेल्या शंकांमुळे नागरिकांमध्येही अस्वस्थता आहे.
9 एप्रिल रोजी लातूर-अंबाजोगाई महामार्गावरील रेणापूर फाट्याजवळ त्यांच्या कारचा भीषण अपघात झाला होता. ते स्वतः गाडी चालवत होते आणि वाहनावरील नियंत्रण सुटल्याने कार पलटी झाल्याचा प्राथमिक अंदाज पोलिसांनी व्यक्त केला होता. मात्र आता समोर आलेल्या नव्या घडामोडींमुळे या प्रकरणाची सखोल चौकशी होण्याची मागणी जोर धरत आहे.
