लोणी काळभोर (पुणे) : हडपसर-सासवड रस्त्यावर दुचाकीला अज्ञात वाहनाने दिलेल्या धडकेत दुचाकीस्वाराचा जागीच मृत्यू झाल्याची घटना घडली आहे. वडकी (ता. हवेली) ग्रामपंचायत हद्दीतील धनलक्ष्मी वजन काट्यासमोर मंगळवारी (ता. १९) रात्री साडेदहा वाजण्याच्या सुमारास ही घटना घडली.
रवींद्र दादासो देवकर (वय ४१, रा. अनुसया विश्व, ढमाळवाडी, भेकाराईनगर, फुरसुंगी, ता. हवेली) असे अपघातात निधन झालेल्या व्यक्तीचे नाव आहे. याप्रकरणी त्यांचे चुलत बंधू महादेव देवकर (वय ४१, रा. सदर) यांनी लोणी काळभोर पोलीस ठाण्यात अज्ञात व्यक्तींच्या विरोधात फिर्याद दिली आहे.
पोलिसांनी दिलेल्या माहितीनुसार, मंगळवारी रात्री साडेदहा वाजण्याच्या सुमारास रवींद्र देवकर हे राहत्या घरातून दुचाकी घेऊन निघाले होते. वडकी ग्रामपंचायत हद्दीतील धनलक्ष्मी वजन काट्यासमोर आले असता त्यांच्या दुचाकीला पाठीमागून अज्ञात वाहनाने जोरदार धडक दिली.
दरम्यान, या अपघातात देवकर यांच्या डोक्याला हाताला गंभीर जखम झाली होती. त्यांना रुग्णालयात दाखल करण्यात आले. मात्र, उपचारापूर्वीच त्यांचे निधन झाल्याचे डॉक्टरांनी सांगितले. या प्रकरणी अज्ञात व्यक्तीविरोधात लोणी काळभोर पोलीस ठाण्यात गुन्हा दाखल करण्यात आला आहे. अधिक तपास पोलीस उपनिरीक्षक बिराजदार करीत आहेत.
