भोर : डोक्याला बांधलेला स्कार्प मळणी यंत्रात ओढला जाऊन महिलेचे डोके यंत्रात अडकल्याने जागीच मृत्यू झाला. ही दुर्दैवी घटना केंजळ (ता. भोर) येथे शनिवारी (दि. २६) घडली. या प्रकरणी राजगड पोलीस ठाण्यात नोंद झाली आहे. सावित्रा पांडुरंग गायकवाड (वय २४) असे मयत महिलेचे नाव आहे. महिलेचे पती पांडुरंग गायकवाड (वय ३८, सध्या रा. केंजळ, ता. भोर, मूळ रा. आंतरावली, ता. गणसांगवी, जि. जालना) यांनी राजगड पोलीसात खबर दिली आहे.
राजगड पोलिसांनी दिलेल्या माहितीनुसार मयत महिला ही आपल्या कुटुंबीयांसोबत गेली ५ वर्ष केंजळ (ता. भोर) येथील मयूर चव्हाण यांच्या शेतातील कामे करून उपजीविका करत आहेत. शनिवारी सायंकाळी मयत महिला व त्यांचे पती यांनी शेतातील बाजरी भरडण्यासाठी नितीन बाठे यांचे मळणी यंत्र बोलावले. त्यांनतर काही वेळाने बाजरी भरडताना मशिनमध्ये पडलेली बाजरीचे कनसे उचलत असताना मयत महिलेच्या डोक्यावर बांधलेला स्कार्प व डोक्याचे केस हे ट्रॅक्टर व मळणी यंत्र जोडणाऱ्या फिरत्या रॉडला अडकल्याने तिचे डोकेही फिरत्या रॉडमध्ये अडकले.
या दुर्दैवी घटनेत अक्षरशः महिलेचे शीर धडावेगळे होऊन महिलेचा जागीच मृत्यू झाला. राजगड पोलिसांनी घटनास्थळी भेट देऊन पंचनामा केला. त्यानंतर मृतदेह ताब्यात घेऊन शवविच्छेदनासाठी भोर येथील उपजिल्हा रुग्णालयात पाठवला. या बाबतचा पुढील तपास राजगड पोलीस करीत आहेत. मळणी करताना महिलांनी काळजी घेतली पाहिजे, असे आवाहन पोलिसांनी केले आहे.
