बारामती, ता. 14 : अपघाताचा गुन्हा दाखल न करण्यासाठी व वाहन सोडवण्यासाठी 30 हजार रुपयांची लाच मागीतल्याप्रकरणी बारामती तालुका पोलीस ठाण्यातील सहाय्यक फौजदारसह खाजगी इसमावर लाचेचा गुन्हा करण्यात आला आहे.
सुनिल माणिक जगताप (वय 56 , बारामती तालुका पोलिस ठाणे, पुणे ग्रामीण (वर्ग-3. अराजपत्रित) व खाजगी इसम प्रविण भाऊसाहेब भोसले (वय 39) असे गुन्हा दाखल करण्यात आलेल्यांची नावे आहेत. याप्रकरणी एका 26 वर्षीय व्यक्तीने लाचलुचपत प्रतिबंधक विभागाकडे तक्रार केली होती.
लाचलुचपत प्रतिबंधक विभागाने दिलेल्या माहितीनुसार, तक्रारदार हे चालवीत असलेल्या मोटार वाहनाचा अपघात झाला होता. सदर अपघाताचा गुन्हा दाखल न करण्यासाठी व वाहन सोडवण्यासाठी सहाय्यक फौजदार सुनिल जगताप यांनी तक्रारदाराकडे 30 हजार रुपयांच्या लाचेची मागणी केली होती. याप्रकरणी तक्रारदार यांनी लाचलुचपत प्रतिबंधक विभागाकडे तक्रार दिली होती.
मिळालेल्या तक्रारीच्या अनुषंगाने लाचलुचपत प्रतिबंधक विभागाने पडताळणी केली असता, सहाय्यक फौजदार सुनिल जगताप याने तक्रारदारावर अपघाताचा गुन्हा दाखल न करण्यासाठी व वाहन सोडवण्यासाठी तक्रारदाराकडे सुरवातीस 15,000 रुपयांच्या लाचेची मागणी केली. तडजोडीअंती 10 हजार रुपयाची लाचेची मागणी करून ती स्विकारण्याचे मान्य केले. तसेच या लाचेच्या मागणीस खाजगी इसम प्रविण भोसले यांनी अपप्रेरणा दिल्याचे लाचलुचपत प्रतिबंधक विभागाच्या तपासात निष्पन्न झाले आहे.
त्यानुसार दोघांच्या विरोधात बारामती तालुका पोलीस ठाण्यात भ्रष्टाचार प्रतिबंध अधिनियम, सन 1988 चे कलम 7, 74, 12 अन्वये गुन्हा दाखल करण्यात आला आहे. पुढील तपास पुणे लाचलुचपत प्रतिबंधक विभागाचे पोलीस निरीक्षक प्रविण निमाळकर करत आहेत.
