राहू : बँकेचे एटीएम काढून न दिल्याच्या रागातून युको बँकेच्या सह व्यवस्थापकाला लाकडी दांडक्याने मारहाण करत जीवे मारण्याची धमकी दिल्याची गंभीर घटना दौंड तालुक्यातील राहू येथे घडली.
याबाबत यवत पोलिसांनी दिलेली अधिक माहिती अशी की, विष्णुदास दामोदरम पेरीयाडात राहू येथील युको बँकेत सहव्यवस्थापक म्हणून कार्यरत आहेत. ते आपले कर्तव्य बजावत असताना बँकेच्या पुढील राहू-वाघोली रोडवर आरोपी महेश शिवाजी हंबीर (रा. पाटेठाण ता दौंड जि. पुणे), ओंकार शांताराम गायकवाड (रा. मेमाणवाडी, टाकळी भीमा ता. दौंड जि. पुणे) व इतर चार अनोळखी लोकांनी रस्ता अडवून बँकेचे एटीएम कार्ड काढून दिले नाही. या कारणास्तव लाकडी दांडक्याच्या साह्याने विष्णुदास दामोदरम पेरीयाडात यांना मारहाण केली. तसेच त्यांच्या सहकाऱ्यांना शिवीगाळ करत जीवे मारण्याची धमकी दिली.
याबाबत विष्णुदास पेरीयाडात यांनी यवत पोलीस ठाण्यात तक्रार दाखल केली आहे. महेश शिवाजी हंबीर, ओंकार शांताराम गायकवाड व इतर चार अनोळखी व्यक्तींवर गुन्हा दाखल करण्यात आला आहे. दरम्यान, यवत पोलिसांच्या वतीने आरोपींचा शोध सुरू करण्यात आला असून सध्या आरोपी फरार असल्याचे यवत पोलिसांनी सांगितले. पुढील तपास पोलीस निरीक्षक नारायण देशमुख यांच्या मार्गदर्शनाखाली पोलीस हवालदार संतोष कदम करत आहेत.
