पुणे : मुंबई-बंगळुरू बाह्यवळण मार्गावर नवीन कात्रज बोगद्यात शुक्रवारी दुपारी एक विचित्र अपघात झाला. सध्या बोगद्यात दुरुस्तीचे काम सुरू असल्याने एक चारचाकी गाडी अचानक थांबली. त्यापाठोपाठ चार गाड्या आदळल्याने वाहतूक विस्कळीत झाली. सुदैवाने या घटनेत कोणीही जखमी झाले नाही. बाह्यवळण मार्गावर नवीन कात्रज बोगद्यात शुक्रवारी दुपारी दुरुस्तीचे काम सुरू होते. त्यावेळी साताऱ्याकडून पुण्याकडे निघालेली एक चारचाकी गाडी अचानक थांबली. त्यापाठोपाठ पाठीमागून येणाऱ्या गाड्या एकमेकांवर आदळल्या. या अपघातात मोटारींचे नुकसान झाले.
सदर अपघातानंतर काही काळ वाहतूक विस्कळीत झाली. या घटनेची माहिती मिळताच भारती विद्यापीठ पोलिसांनी घटनास्थळी धाव घेत तातडीने मदतकार्य सुरू केले. अपघातग्रस्त मोटारी बाजूला काढण्यात आल्यानंतर वाहतूक सुरळीत झाली, अशी माहिती भारती विद्यापीठ पोलीस ठाण्याचे वरिष्ठ पोलीस निरीक्षक विनायक गायकवाड यांनी दिली.
