पुणे : सावित्रीबाई फुले विद्यापीठातील हॉस्टेलच्या भिंतीवर पंतप्रधान नरेंद्र मोदी यांच्याबद्दल आक्षेपार्ह पेंटिंग काढण्यात आली होती. आक्षेपार्ह मजकूरही लिहिण्यात आला होता. अभाविपने या घटनेचा निषेध नोंदवला आहे. या घटनेचे जोरदार पडसाद उमटले असून, भाजप युवा मोर्चाने देखील जोरदार निषेध नोंदवला आहे. या घटनेच्या निषधार्थ भाजप युवा मोर्चाच्या पदाधिकाऱ्यांनी पुणे विद्यापीठ परिसरात जोरदार निदर्शने केली. यावेळी ‘एसएफआय’च्या कार्यकर्त्यांसोबत त्यांची बाचाबाची झाली. दोन्ही संघटनांचे कार्यकर्ते समोरासमोर आल्याने विद्यापीठ परिसरात एकच गोंधळ उडाला. पोलिसांनी या सर्व कार्यकर्त्यांना ताब्यात घेतले आहे.
विद्यापीठाच्या आठ नंबर होस्टेलमध्ये पंतप्रधान नरेंद्र मोदी यांच्याबद्दल आक्षेपार्ह पद्धतीची पेंटिंग काढल्याची घटना घडली आहे. विद्यापीठाने पोलीस स्टेशनला तक्रार दिली आहे. संबंधितांना अटक करून गुन्हे दाखल करा, अन्यथा आम्ही तीव्र आंदोलन करू असा इशाराच अभाविपने दिला होता. मात्र, विद्यापीठाकडून कोणतीही कारवाई न केल्याने अखेर भाजप युवा मोर्चाच्या कार्यकर्त्यांनी विद्यापीठात जोरदार निदर्शने केली. युवा मोर्चाचे कार्यकर्ते मोठ्या संख्येने विद्यापीठ परिसरात आले होते.
आंदोलन करण्यापूर्वी आंदोलकांनी पूर्वकल्पना दिल्यामुळे पुणे विद्यापीठात पोलिसांचा मोठा बंदोबस्त तैनात ठेवण्यात आला होता. आंदोलनात विद्यार्थ्यांचा लक्षणीय सहभाग होता. आंदोलकांनी जोरदार घोषणाबाजी केल्याने परिसरात एकच गोंधळ उडाला. यावेळी भाजप युवा मोर्चाच्या कार्यकर्त्यांची एसएफआय या विद्यार्थी संघटनेच्या कार्यकर्त्यांशी शाब्दिक चकमक उडाली. त्यामुळे दोन्ही संघटनांमध्ये वातावण तापले होते. दोन्ही संघटना एकमेकांना भिडल्यानंतर पोलिसांनी आंदोलकांची धरपकड केली. इतर आंदोलकांना शांततेचे आवाहन केले.
दरम्यान, विद्यापीठ परिसरात सुमारे तासभर गोंधळ सुरू होता. मात्र, सर्वांना शांत करण्यात पोलिसांना अखेर यश आले. दंगलसदृश्य परिस्थिती पुन्हा उद्भवू नये यासाठी खबरदारीचा उपाय म्हणून विद्यापीठ परिसरात अद्याप पोलीस बंदोबस्त ठेवण्यात आला आहे.
