वार्ताहार – विजय लोखंडे
वाघोली : वाघोली येथे पुणे-नगर रोडवर देहविक्री करणाऱ्या महिलांच्या दलालांकडून एका तरुणाला बेदम मारहाण करण्यात आली. याप्रकरणी लोणीकंद पोलीस स्टेशनला मारहाण करणाऱ्यांविरुद्ध गुन्हा दाखल करण्यात आला आहे.
याबाबत मिळालेल्या माहितीनुसार, वाघोली येथे पुणे-नगर रोड, वाघोली-लोहगाव रोडलगत बार व लॉजिंग मोठ्या प्रमाणावर असल्याने काही दलालांकडून महिलांची देहविक्री केली जाते. सायंकाळपासूनच रात्री उशिरापर्यंत देहविक्री करणाऱ्या महिला वाघोली येथे पुणे-नगर महामार्गावरील पदपथावर उभ्या राहून ग्राहकांच्या शोधात असतात. त्यांच्या बाजूलाच काही अंतरावर एजंट थांबलेले असतात. बुधवारी (5 जून) रात्री पाऊणे अकराच्या सुमारास देहविक्री करणाऱ्या महिलांच्या काही दलालांनी दीपक कैलास परांडे (रा. रेणुका पार्क,उबाळे नगर) या तरुणाला डोक्यात बेदम मारहाण केली. याप्रकरणी दीपक परांडे यांच्या तक्रारीवरून लोणीकंद पोलीस ठाण्यात गुन्हा दाखल करण्यात आला आहे.
दरम्यान या प्रकरणी सामाजिक कार्यकर्त्या सीमा गुट्टे यांच्या नेतृत्वाखाली नागरिकांसह महिलांनी वाघोली पोलीस चौकीला जावून पुणे-नगर रोडवर देहविक्री करणाऱ्या महिलांसह त्यांचा दलालांवर कडक कारवाई करावी. तसेच पोलीस ठाण्याच्या हद्दीतील फोफावलेल्या वेश्या व्यवसायांवर कडक कारवाई करा अशी मागणी केली आहे.
यावेळी सहा.पोलीस निरीक्षक चेतन थोरबोले म्हणाले, लोणीकंद पोलीस स्टेशन हद्दीत अवैध धंदे किंवा दलालांकडून महिलांची देहविक्री केली जात असेल तर कायदेशीर कारवाई केली जाईल. सामाजिक शांतता बिघडवणाऱ्यांची गय केली जाणार नाही. तसेच पोलीस ठाणे हद्दीत वेश्या व्यवसाय चालू असेल तर सर्व हॉटेल, लॉजवर प्रत्यक्षात जाऊन तपासणी करीत वेश्या व्यवसाय करणाऱ्यांवर कडक कायदेशीर कारवाई केली जाईल.
