पुणे : बाजीराव रस्त्यावरील राणा प्रताप उद्यानासमोर सोमवारी मध्यरात्री अपघाताची घटना घडली. मोटारीवर दुचाकी आदळून दूचाकीस्वार तरुणाचा मृत्यू झाला तर दुचाकीवरील सहप्रवासी तरुण गंभीर जखमी झाला आहे.
याबाबत मिळालेल्या अधिक माहितीनुसार, गुंजन दत्तात्रय सोनवणे (वय २५, रा. कोथरुड) असे मृत्युमुखी पडलेल्या तरुणाचे नाव आहे. अपघातात दुचाकीवरील सहप्रवासी तरुण शुभम गवांदे जखमी झाला आहे. याबाबत दिलीप पुरोहित (वय २१, रा. प्राधिकरण, निगडी) याने खडक पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, मोटारचालक पुरोहित मध्यरात्री दोनच्या सुमारास बाजीराव रस्त्याने निघाला होता. त्यावेळी दुचाकीस्वार सोनवणे आणि त्याचा मित्र गवांदे भरधाव वेगाने निघाले होते. राणा प्रताप उद्यानासमोर भरधाव दुचाकी मोटारीवर आदळली. या अपघातात सोनवणे गंभीर जखमी झाला. सोनवणे आणि त्याचा मित्र गवांदे यांना रुग्णालयात दाखल करण्यात आले. मात्र, उपचारांपूर्वीच सोनवणे याचा मृत्यू झाला.
या घटनेचा अधिक तपास पोलीस उपनिरीक्षक विनय जाधव करत आहेत.
