पुणे : पुण्यातील स्वारगेट परिसरात एक धक्कादायक प्रकार घडला आहे. 25 वर्षीय महिला घरात अंघोळ करत असताना ओळखीच्या एका तरुणाने तिच्या घरात शिरुन तिला बाथरुमधून बळजबरीने बाहेर ओढून जबरदस्तीने तिच्यावर बलात्कार केल्याची घटना घडली आहे. त्यानंतर पुन्हा महिला चुलत सासरच्या घरी गेली त्यावेळी तिसऱ्या मजल्यावर पाण्याची टाकी तपासणीसाठी गेल्या असताना दोन जणांनी तिचा पाठलाग करुन तिच्यावर आळीपाळीने बलात्कार केला. ही घटना शहरातील स्वारगेट परिसरात घडली आहे.
याबाबत पिडित महिलेने तीन आरोपी विरोधात स्वारगेट पोलिस ठाण्यात फिर्याद दाखल केली आहे. त्यावरून पोलिसांनी तीन जणांविरुद्ध गुन्हा दाखल केला आहे.
पोलिसांनी दिलेल्या माहितीनुसार, फिर्यादी महिला ही स्वारगेट परिसरात राहण्यास आहे. महिला घरात अंघोळ करत असताना सुरुवातीला एक आरोपी तिच्या घरी आला व त्याने तिच्यावर जबरदस्तीने बलात्कार केला. तसेच तिचा गळा दाबून कोणाला काही सांगितले तर तुला व तुझ्या मुलांना जीवे ठार मारण्याची धमकी दिली.
त्यानंतर पिडित महिला ही तिच्या चुलत सासऱ्यांच्या घरी गेली. त्यावेळी ती तिसऱ्या मजल्यावर पाण्याची टाकी तपासणीसाठी गेली होती. त्यावेळी दोन आरोपी जबरदस्तीने तिच्या मागून येऊन एका रुम मध्ये नेऊन तिच्यावर आळीपाळीने बलात्कार केला. महिलेने या प्रकाराला विरोध केला असता तिला आरोपींनी मारहाण केली व सदर प्रकाराबाबत कोणाला काही सांगितले तर तुझी समाजात बदनामी करण्याची धमकी दिल्याचे फिर्यादीत नमूद केले आहे. याप्रकरणी पुढील तपास महिला पोलिस उपनिरीक्षक एस पाटील करत आहे.
