आळंदी : पुण्यातील पोर्शे कार अपघाताची पुनरावृत्ती आळंदीत समोर आली आहे. सतरा वर्षीय अल्पवयीन मुलाने भरधाव वेगात चारचाकी गाडी चालवून महिलेसह नागरिकांना चिरडण्याचा प्रयत्न केला आहे. या घटनेचा थरार कॅमेऱ्यात कैद झाला आहे. ही घटना आळंदी जवळील वडगाव घेणंद येथे घडली. याप्रकरणी सतरा वर्षाच्या अल्पवयीन मुलावर आळंदी पोलिसांनी गुन्हा दाखल केला आहे.
याप्रकरणी वडगाव घेनंद येथील नाजुका रणजित थोरात यांनी फिर्याद आळंदी पोलीस ठाण्यात फिर्याद दिली आहे. ही घटना तीन दिवसांपूर्वी शनिवारी (ता. १५) घडली आहे. याबाबतचा व्हिडिओ आता सोशल मीडियावर व्हायरल झाल्याने आळंदी आणि परिसरात मोठी खळबळ उडाली आहे.
पोलिसांनी दिलेल्या माहितीनुसार, आळंदी जवळील वडगाव घेनंदमधील गणेश नगरमधे फिर्यादी नाजुका थोरात राहत आहेत. थोरात आणि अल्पवयीन मुलाचे पूर्वी भांडण झाले होते. याच रागातून त्याने हे कृत्य केले असल्याचे फिर्यादीत म्हटले आहे. अल्पवयीन मुलाने त्याच्याकडील चारचाकी कार (एमएच १४, एचडी ५७४९) भरधाव वेगात चालवून नाजुका थोरात यांच्या अंगावर घातली. मात्र, थोरात बाजूला झाल्याने बचावल्या.
दरम्यान, ज्या रस्त्यावरून अल्पवयीन मुलाने गाडी चालविली त्या रस्त्यावर आणखी पाच सहा नागरिक होते. त्यातील दोघांच्या हातात लाकडी दांडकेही होते. भांडणाचा प्रकार सुरू असताना या मुलाने त्याच्याकडील कार शंभर मीटर अंतर मागे नेली, आणि पुन्हा त्याच वेगाने कार पुढे चालवून घटनास्थळी उपस्थित अन्य लोकांच्याही अंगावर घालण्याचा प्रयत्न केला. यामधे एक वृद्ध व्यक्तीही होता. यावेळी भरधाव वेगात येणारी कार पाहून लोक बाजूला झाल्याने मोठी दुर्घटना टळली.
कारच्या टपावर उभे राहून शर्ट काढला
भरधाव वेगात कार पुढे नेत अल्पवयीन मुलाने कारच्या टपावर उभे राहून शर्ट काढला आणि थोरात यांच्याकडे पाहून शिवीगाळ केली. याप्रकरणी आळंदी पोलिस ठाण्यात अल्पवयीन मुलावर गुन्हा दाखल करण्यात आला असून मुलाला ताब्यात घेतले आहे.
