पुणे : गेल्या काही दिवसांपासून सहाय्यक पोलीस अधीक्षक सत्यसाई कार्तिक यांनी अवैध धंद्यांवर कारवाईचा बडगा उगारला आहे. अशातच आता जुन्या पुणे- मुंबई महामार्गावर गांजा विक्री करण्यासाठी आलेल्या टोळीवर लोणावळा ग्रामीण पोलिसांनी कारवाई केली आहे. हि कारवाई ११ जुलै रोजी पहाटे ३ वाजण्याच्या सुमारास जुन्या पुणे- मुंबई महामार्गावर तेजस धाब्याच्या समोर केली.
या कारवाईत १४ लाखांचा ४८ किलो गांजा पोलिसांनी जप्त केला असून आरोपींना अटक केली आहे. नितीन शिवाजी लेहने (वय-38, रा. औरंगपूर, ता. शिरूर, जि. बीड), संदिपान पाटलोबा गुट्टे (वय-39, रा. परळी वैजनाथ, ता. परळी, जि. बीड) गणेश सुरेश दराडे (वय-30, रा. केज, ता. केज, जि. बीड) अशी अटक केलेल्या आरोपींची नाव आहेत.
पोलिसांनी दिलेल्या माहितीनुसार, गेल्या काही दिवसांपासून लोणावळा परिसरात गांजा विक्री करणाऱ्या गुन्हेगारांवर लोणावळा ग्रामीण पोलिसांची करडी नजर आहे. नशा मुक्तीच्या संदर्भात अभियान देखील लोणावळा पोलिसांनी सुरु केलं आहे. लोणावळा परिसरातील कार्ला येथे जुना पुणे- मुंबई महामार्गावर काही जण गांजा विक्री करण्यासाठी येणार असल्याची माहिती सहाय्यक पोलीस अधीक्षक सत्यसाई कार्तिक यांना मिळाली. त्या माहितीच्या आधारे पोलिसांचे एक पथक सापळा लावून हॉटेल तेजस येथे थांबले.
पहाटे तीनच्या सुमारास काही संशयित चारचाकी गाडीतून आले. साध्या वेशातील पोलिसांनी त्यांना हटकले. तिघे जण उडवाउडवीची उत्तरे देत होती. अखेर त्यांच्या चारचाकी गाडीची पंचासमक्ष पोलिसांनी झडती घेतली. त्यावेळी गाडीच्या डिक्कीत दोन गोणीमध्ये ४८ किलो गांजा आढळून आला. दरम्यान पोलिसांनी ४८ किलो गांजा आणि गाडीसह एकूण १४ लाख रुपयांचा मुद्देमाल जप्त केला. तीनही आरोपींवर लोणावळा ग्रामीण पोलीस ठाण्यात गुन्हा दाखल करण्यात आला आहे. पुढील तपास पोलीस करत आहेत.
