पुणे : पुण्यातील हडपसर परिसरात अपघाताच्या तीन घटना घडल्या आहेत. या अपघातात एकाचा मृत्यू झाला असून, दोघेजण जखमी झाले आहेत. याबाबत अधिक माहितीनुसार, हडपसर भागात मांजरीच्या दिशेने जाणाऱ्या रस्त्यावर आईसोबत पायी चालत असलेल्या मुलाला मागून धडक दिली. या धडकेत मुलाच्या उजव्या हाताचे मनगट फ्रॅक्चर झाले आहे. याप्रकरणी आईने दिलेल्या फिर्यादीवरून निखिल सुभाष जाधव (रा. आव्हाळवाडी) याच्यावर गुन्हा दाखल करण्यात आला आहे. हा अपघात ६ मार्च रोजी रात्री १० वाजण्याच्या सुमारास झाला.
दुसरा अपघात हडपसर भागातच घडला आहे. घराकडे जात असलेल्या २६ वर्षीय तरुणाला पाठीमागून येणाऱ्या एका अज्ञात दुचाकीस्वाराने धडक दिल्याने तो पुलावरून खाली पडला आणि त्याचा मृत्यू झाला. पूजन विश्वजित आढाव (वय २६), असे मृत तरुणाचे नाव आहे. याप्रकरणी मृताचा भाऊ प्रथमेश आढाव याने फिर्याद दिली आहे. हा अपघात ४ मार्च रोजी रात्री दीड वाजण्याच्या सुमारास घडला.
तिसरा अपघात हडपसर येथील हांडेवाडी भागात घडली आहे. रस्ता ओलांडताना भरधाव दुचाकीस्वाराने धडक दिल्याने एक ३२ वर्षीय व्यक्तीच्या उजव्या गालाचे हाड फ्रॅक्चर झाले. याप्रकरणी मासूम असिफ अली सय्यद (वय ३२, सय्यदनगर) यांनी हडपसर पोलिस ठाण्यात फिर्याद दिली आहे. पुढील तपास पोलीस करत आहेत.
