इंदापूर (पुणे) : विहिरीत पाय घसरुन पडल्याने सारिका पिराजी शिंदे (वय 15, रा. परतुर, ता. परतुर जि. जालना) हिचा दुर्देवी मृत्यू झाला आहे. पुण्याच्या इंदापूर तालुक्यातील राजवडी पाटी येथील ही घटना आहे.
शिंदे हे कुटुंब मोलमजूरी करणारं कुटुंब आहे. राजवडी या परिसरात एका ठेकेदाराकडे ते काम करत होते. सारीका शिंदे ही मुलगी (दि. 24) सोमवारी आज सकाळी साडेसात वाजण्याच्या सुमारास विहिरीवरती पाणी आणण्यासाठी गेली होती त्यावेळेस तिचा पाय घसरुन मृत्यू झाला आहे.
इंदापूर पोलीस आणि महसूल प्रशासन घटनास्थळी दाखल झाले होते. सकाळी साडेसात वाजल्यापासून या मुलीचा शोध घेतला जात होता. तब्बल साडेसहा तासानंतर पोलीस प्रशासन, महसूल यंत्रणा आणि स्थानिक नागरिकांच्या मदतीने विहिरीतील पाण्याचा साठा बाहेर काढून या मुलीचा मृतदेह बाहेर काढण्यात आला.
संबंधित मुलगी ही विहिरीवरती पाणी आणण्यासाठी गेली होती. मात्र ती घरी परतली नसल्याने तिचा शोध सुरू झाला. त्यानंतर विहिरीच्या कडेला तिने आपल्या सोबत नेलेल्या काही वस्तू आढळून आल्या. त्यानंतर ही मुलगी विहिरीत पाय घसरून पडून बुडाली असावी असा अंदाज व्यक्त केला गेला आहे.
सकाळी नऊ वाजल्यापासून इंदापूर तालुक्याचे तहसीलदार श्रीकांत पाटील, इंदापूर पंचायत समितीचे गटविकास अधिकारी सचिन खुडे आणि इंदापूर पोलीस ठाण्याचे सहाय्यक पोलीस निरीक्षक एस.ई.राऊत यांसह त्यांचे सहकारी पथक घटनास्थळी दाखल होते.
