Mahadev Jankar : पुणे : काँग्रेस आणि भाजप हे मोठे पक्ष आहेत. यांचा सगळा कारभार दिल्लीतून चालतो. हे पक्ष आपल्याला गिळून टाकण्याचं काम करतात. भाजप असो वा काँग्रेस हे आपल्या फार हिताचे नसल्याचे वक्तव्य राष्ट्रीय समाज पक्षाचे अध्यक्ष महादेव जानकर यांनी केलं. (Mahadev Jankar)
पुणे जिल्ह्यातील पुरंदर तालुक्यातील नीरा येथील एका कार्यक्रमात बोलत होते. जानकर हे सध्या भाजपचे मित्रपक्ष आहेत. मात्र, भाजपच्या विरोधातच त्यांनी हे वक्तव्य केल्यानं राजकीय वर्तळात त्यांच्या वक्तव्याची चर्चा होत आहे.
महादेव जानकर म्हणाले की, ‘ मोठे पक्ष दिल्लीतून राज्य कारभार करतात आणि आपल्याला संपवून टाकतात. एकवेळ एकनाथ शिंदेच्या पक्षाला मदत करा, पवारांच्या पक्षाला मदत करा पण भाजप आणि काँग्रेसला मदत करु नका.’
राष्ट्रीय समाज पक्षाचे दिल्लीत कार्यालय उभारण्यात येणार आहे. यासाठी जागा व इमारत असे चार कोटी रुपयांची गरज आहे. त्यासाठी मदत जमा करण्याचे काम सुरू आहे. त्यानिमित्त जानकर विविध कार्यक्रमात उपस्थित राहत आहेत.
दरम्यान, ‘मी पंतप्रधान होणार हे ध्येय उराशी बाळगून उत्तरप्रदेश, पंजाब याठिकाणी जावून राजकीय धडे घेत आपल्या राज्यात सर्व जाती धर्माच्या लोकांना बरोबर घेऊन जिद्द, चिकाटी व आत्मविश्वासाच्या जोरावर संघटना वाढीसाठी राज्यभर फिरलो. आज राष्ट्रीय समाज पक्षाने आपली ताकद निर्माण केली आहे. असं वक्तव्य जानकर यांनी यापूर्वी एका कार्यक्रमात केलं होत.
