पुणे : भारतीय क्रिकेट संघाचा न्यूझीलंड दौरा 22 ऑक्टोबरपासून सुरू होणार आहे. या दौऱ्यासाठी नुकतीच एकदिवसीय आणि कसोटी संघाची घोषणा करण्यात आली आहे. मात्र या संघनिवडीत काही प्रमुख खेळाडूंना वगळल्याने त्यांच्या भविष्याविषयी प्रश्नचिन्ह निर्माण होऊन नव्या चर्चांना उधाण आले आहे.
मालिकेतील पहिल्या तीन सामन्यांमध्ये शुभमन गिल संघाचे नेतृत्व सांभाळणार असून, शेवटच्या दोन सामन्यांत श्रेयस अय्यरकडे कर्णधारपदाची धुरा सोपवण्यात आली आहे. दुसरीकडे, वेगवान गोलंदाज जसप्रीत बुमराहला कसोटी मालिकेपूर्वी पूर्णपणे तंदुरुस्त राखण्यासाठी एकदिवसीय संघात विश्रांती देण्यात आली आहे.
. रोहित शर्मा आणि शुभमन गिल सलामीचे प्रमुख पर्याय असल्याने युवा फलंदाज यशस्वी जैस्वालला संघात स्थान मिळालेले नाही. त्यामुळे 2027 च्या विश्वचषकासाठी त्याला आणखी प्रतीक्षा करावी लागण्याची शक्यता आहे.
यष्टीरक्षक म्हणून केएल राहुल मुख्य पर्याय असला, तरी दुसऱ्या पर्यायासाठी ऋषभ पंतऐवजी इशान किशनला प्राधान्य दिले जात आहे. त्यामुळे पंतचा मर्यादित षटकांच्या क्रिकेटमधील मार्ग कठीण झाला असून, त्याला सध्या केवळ कसोटी संघातच संधी मिळाली आहे.
याशिवाय, अनुभवी अष्टपैलू रवींद्र जडेजा आणि वेगवान गोलंदाज मोहम्मद शमी यांच्याकडेही दुर्लक्ष करण्यात आले असून जडेच्या जागी नमन धीरला संधी मिळाली आहे, तर रणजी करंडकात दमदार कामगिरी करूनही शमीला संघात स्थान मिळालेले नाही.
दुसरीकडे, ऋतुराज गायकवाडसाठी ही मालिका अत्यंत महत्त्वाची ठरणार आहे. सलग दुसऱ्या मालिकेत निवड झाल्यामुळे त्याला आपली क्षमता सिद्ध करून एकदिवसीय संघात स्वतःचे स्थान पक्के करण्याची सुवर्णसंधी मिळाली आहे. आता हे खेळाडू आगामी सामन्यांमध्ये कशी कामगिरी करतात, याकडे सर्वांचे लक्ष लागले आहे.
